Şaîr û nuştoxo kurd Fadil Ozturk ke no wextêk o ke tedawî dîyêne, şi heqîya xo.
Nameyanê muhîm ê edebîyatî ra şaîr û nuştox Fadil Ozturk vizêr şandî Îzmîr de nêweşxaneyê Unîversîteya Egeyî ke tede tedawî dîyênê, uca de şi heqîya xo. 5ê teşrîna verêne ya 2024î de teşhîsê nêweşîya kanserê cîgerî ra aşma kanûne ra nat binê tedawî de bi.
Fadil Ozturk ke serra 1955î de Dêrsim de ameyo dinya, badê ke wendişê xo yo verên û mîyanên Xarpêt de qedênayo, Lîseya Dêrsim ra mezun bîyo. Sebebanê sîyasîyan ra nêeşkayo wendişê xo yo berz bidomno. Badê darbeyê 12ê Êlule 1980î çarçewaya dewaya Dev-Yolî de bi cezaya hepsî ya bêpeynîye ame cezakerdiş û nêzdîyê 10 serrî hepis de mendo. Badê ke hepis ra vejîyayo, xebatê xo yê edebî û sîyasî domnayê. Şîirê ey kovaran de sey Kunduz Duşlerî û Utopîa de ameyê weşanayene.
Badê ke hepis ra vejîyayo, Kolektîfê Pîya de ca girewto. Rojname û kovaran de şîîr û nuşteyî weşanayê. Kitabo yewin o ey ‘Suyu Uyandırın Sesim Olsun’ Xelata Şîîrî ya Enver Gokceyî ameye dayene. Tayê şîirê Ozturkî zî ameyê bestekerdiş.
Ozturk ke waranê sîyasî û komelî de zî aktîf bi. Serra 2004î de îlanêko ke bi sernameyê “Waştişê Kurdanê ke Tirkîya de yê” rojnameyê Herald Tribuneyî de ca girewt. serra 2005î de bi endamê desteyê koordinasyonî yê Platformê Roşnvîranê Munzurî ke amebi awankerdiş û eynî serre de beşdarê kampanyaya piştgirîye ya Roj TV’yî bi.
Serra 2018î de seba nuşteyê xo yê Rojnameyê Artî Gerçekî ame destbendkerdiş, cezaya 1 serre û 10 aşman girewt û cezaya ey 5 serrî ameye taloqkerdiş. Serra 2023î de seba parekerdişanê xo yê medyaya dîjîtale embaza xo Berrîn Bîcek Ozturk reyde reyna ame destbendkerdiş. Labelê dewaya ke serra 2024î de ameye dîyene, aye de beraet kerd.
