Rêxistina DEM Partî ya Îzmîrî semedê tewrbîyayîşî pîrozbaya 1ê Gulane Roşanê Karkeran vengdayîşê tewrbîyayîşî kerd.
Rêxistina DEM Partî ya Îzmîrî derheqê xebatanê 1ê Gulane Roşanê Karkeran awanîya xo ya Konakî de eşkerayîye daye. Eşkerayî de pankartê “semedê azadîya kede û komelo demokratîk ma şêrê 1ê Gulane” ame leqnayene. Sewbîna sloganî “Bicîwîyo 1ê Gulane” ame vatene. Hemsereka DEM Partî ya Îzmîrî Fulya Erdogan dîyar kerd ke ê do bi cesaretê 8ê Adare û bi coşê Newroze biherikîyê wareyê 1ê Gulane.
Fulya Erdogan dîyar kerd ke rejîmê otorîter û zilmkar yê ke kapîtalîzmî awan kerdê, semedê menfeetanê xo dinya rayîrî ra benê. Fulya Erdogan va ke tewr zêde cinî, tut, xoza û kedkarî benê mexdûrê şeran. Fulya Erdogan, dewam de dîyar kerd ke ê demo de ke krîzê ekolojîk, ekonomî û sîyasî dewam kenê, ver bi 1ê Gulane şonê.
Fulya Erdogan, bale ant vengdayîşê tarîxî yê Rayberê Şarê Kurdî Abdullah Ocalanî ser o û va ke babeta awankerdişê komelê demokratîkî de berpirsîyarîyêka pîl dano milê sinifa karker, kedkar û bindestan ser o. Fulya Erdogan va ke sîstemê kedwarî ra razî nîyê û va: “Komel û welatêko adilane, aştîyane û demokratîk bi paştîdayîşê enternasyonal û şorişgerî mumkin o.”
Fulya Erdogan va ke ê do bi cesaretê 8ê Adare û bi coş û hêvîya Newroze wareyê 1ê Gulane de bê û vengdayîşê tewrbîyayîşê her kesî kerd.
