Mîkaîl Aslan do 30 serrîya hunerê xo bi programêko taybet ê bi nameyê “Dîdar” ke muzîkal o, Stenbol de pîroz bikero.
Mîkaîl Aslan deyîrbaz yan zî hunermendêko namdar ê kurd o. O şaristanê Dêrsimî yê Vakûrê Kurdîstanî ra yo. 30 serrî yo lehçeyanê kirmanckî û kurmancî de seba pawitişê kultur û ziwanê xo deyîran kom keno û înan sey deyîre amade keno. Şarê kurdî mîyan de xeylê yeno şinasnayene û wayîrê cayo ke qedirgiran o. Mîkaîl Aslan do 27ê nîsane de Merkezê Mojnayîşî yê Bostancî yê Stenbolî de bi munasebetê 30 serrîya hunerê xo şayîya bi nameyê “Dîdar” organîze bikero.
Do xeylê hunermendê namdarî zî na şayî de ca bigîrê. Deyîrbaz Beser Şahîn, Mem Ararat, Cem Erdost Îlerî, Erkan Ogur û Cemîl Qoçgirî do sey mêman tewrê şayî bibê. Do dima ra zî xeylê cayanê bînan ê dinya de zî na şayîya “Dîdar” bêra organîzekerdene.
Mîkaîl Aslan na raywanîya xo ya hunerî yanî muzîkî ya 30 serran de albumê sey “Agêrayîs, Miraz, Zernkut, Petag û Xoza” vetê. Mîkaîl Aslan par Cemîl Qoçgirî ke 20 serrî yo pîya xebitîyenê, albumê “RûbiRû” amade kerbi û goşdaranê xo reyde pare kerd.
Goşdar û temaşekerdoxî eşkenê bilêtan nê lînkî ra peyda bikerê: https://biletinial.com/tr-tr/muzik/mikail-aslan-didar-neo-traditional-muzikal
