DEM Partî 22ê Nîsane Roja Rojnamgeranê Kurdan pîroz kerd û dîyar kerd ke 127 serrî yê bi hezaran rojnamegerî kurdî bi israr rastî taqîb kenê.
Hetkarê Serekê Komîsyonê Çapemenî, Weşan û Propagandayî yê Partîya Têduştî û Demokrasîyî ya Şaran (DEM Partî) Tayîp Temel bi munasebetê Roja Rojnamgeranê Kurdan eşkerayîyêka nuştekî daye.
Eşkerayî de ame vatene ke çapemenîya kurde gamanê muhîm û tarîxîyan ra yew a û roşnîkerdişê şarê kurd, resnayîşê zîhnîyeto neteweyî û têkoşînê înan ê seypê û azadîye ya û wina ame vatene: “Rojnameyê Kurdîstanê ke çapemenîya kurd û cuya entellektuele de nuqtayêka serdemî yê tarîxî yo, çi heyf ke surgun de, bêîmkanîye de ame weşanayene û rastê zilmî ame. Rixmo ke surgun de dest bi weşanî kerd zî rastîya Kurdîstan û şarê kurdî îfade kerde.”
‘Bi nameyê rastîye’
Eşkerayî de ame vatene ke Rojnameyê Kurdîstanî rojnameyêkî ra avêrêr o û wina ame vatene: “Rojnameyê Kurdîstanî vera înkar, îmha û nezanîye 127 serrî ra ver Rojhelato Mîyanênî de bîyo nameyê heqîqetêko xurt. Seba nê karakterî 22ê Nîsane ke roja awankerdişê rojnameyî yo, serra 1973î ra nat sey Roja Rojnamegeranê Kurd yena qebulkerdene û pîrozkerdene. Bi hezaran rojnamegerê kurdî ê 127 serrî yê rixmê hêrişanê bêmabênan, astengî, polîtîkayê çinkerdişî û asîmîlasyonî û qirkerdişan zî Mîqdat Mîdhed bi israr rêça heqîqetî ser o, rayîro ke Bedirxan akerdo, ey ser rayîrî ra şi û bi israr nê tradîsyonî domna. Rojnamegerî kurdî ê ke rastîyan nusenê zî tarîxê xoverdayîşî rê şahîdî kerda û bîyê parçeyêk tarîxê nê xoverdayîşî. Seba ney bedêlê girdî dayê.
Têkoşînê heqîqetî yê çapemenîya kurde ke destpêkê seserre de vejîya ortei tarîtîya serranê 90î de meşaleyê roşnîye bi rengêko bi coş girewt û serranê 2000î de bedilîyayîşanê sîyasî û amancî rê pêşengî kerde. Na raywanîya heqîqetî pêroyê Rojhelato Mîyanênî de bi taybetî Kurdîstanî de bedilîya vateyê gêrayîşê ‘Aştî û Komelo Demokratîk.’ Seba ney zî Roja Rojnamegerîya Kurd tena nêbîya roja pîrozkerdişî, eynê wextî de bîya sembolê xoverdayîş û têkoşînê heqîqetî. Roja Rojnamegerî heme xebatkaranê çapemenîya kurd û çapemenîya dinya û bi taybetî Mîqdat Mîdhed Bedirxan awankerdoxê Rojnameyê Kurdîstanî rê pîroz bo. Ma şexsê Musa Anter, Gurbetellî Ersoz, Nagehan Akarsel, Cîhan Bîlgîn û Nazim Daştan^, de heme şehîdanê çapemenî bi rêzdarî, rehmet û mînetdarî xovîr anê. Ma sereyê xo vernîya vîrameyîşê înan, mîrasê înan, têkoşîn û xoverdayîşê înan de tewnenê.”
