Vizêr Şaredarîya Girde ya Amedî, Bulwarê Şêx Seîdî ra nameyê Azadî da û bertek qerarê şaredarî ra ame. Babete ser o endamêke Meclîsê Şaredarîya Girde dîyar kerd ke ê nêçare no bulwarî ra nameyê Azadî dayî. Hetkarê Serekê Komeleya Şêx Seîdî Ramazan Arî zî va: “Qerarê Şaredarîya Girde ma nêdejna.”
2024 de Şaredarîya Girde ya Amedî Bulwaro ke 12 Km ra pê yeno ra nameyê Şêx Seîdî dabî. Qerarê Şaredarîya Girde ya Amedî ra pey, Partîya Zaferî Mahkemeya 3. ya Amedî ra seba betalkerdişê nameye Şêx Seîdî ser o dozêk akerdbî û Mahkeme zî serpirodayîşê Partîya Zaferî ser o, qerarê Şaredarîya Girde ya Amedî ya nameyê Şêx Seîdî betal kerdbî.
Di aşmê verî Şaredarîya Girde ya Amedî seba newe ra dayîşê nameyî yê Şêx Seîdî ser o serpiroyê Walîyîya Amedî dabî. Peynîya di aşmî Walîyîya Amedî serpirodayîşê Şaredarîya Girde ya Amedî verpers da; qerarê mahkeme nîşan da û qerarê Şaredarîya Girde ya Amedî ya nameyê Şêx Seîdî qebul nêkerd.
Vizêr zî Meclîsê Şaredarî Girde ya Amedî zî no bulwarî ra nameyêk bido kom bî û Meclîsê Şaredarîya Girde ya Amedî, no bulwarî ra nameyê ‘Azadî’ da.
Walîyîya Amedî qerarê ma red kerd
Ma zî sey Ajansa Welatî, Meclîsê Şaredarîya Girde ya Amedî ra endama meclîsêke ra qise kerd. Endama Meclîsî nêwaşt nameyê xo bida û ma rê agahîyê balkêş da. Endama Meclîsê Şaredarîya Girde ya Amedî dîyar kerd ke di aşmî verî sey Şaredarîya Girde ya Amedî seba newe ra dayîşê nameyî yê Şêx Seîdî ser o ê serpiroyê Walîyîya Amedî kerdbî û wina va: “Peynîya di aşmî Walîyîya Amedî serpirodayîşê ma rê verpers da û qerarê mahkeme ma rê nîşan da. Walîyî va ke şima nêeşkenî nameyê Şêx Seîdî no bulwarî ra bidê. Vizêr zî nêçare Meclîsê Şaredarîya Girde kom bî, çimkî roja peynî bî ke ma nê bulwarî nameyêk bidê, no ser zî ma zî no bulwarî ra nameyê Azadî da.”
‘Qerarê Şaredarîye ma nêdejna’
Qiseyê Endama Meclîsî ra pey, ma Hetkarê Serekê Komeleyê Şêx Seîdî Ramazan Ari reyde qise kerd. Ramazan Ari babete ser o wina va: “Verekna Şaredarîya Girde verê girewtişê qerarî, ma reyde dayîşûgirewtişê fikrî bikerdînî. Ma na babete de şaredarî rexne kenî. Nameyê Azadî dayîşî zî ma nêdejna çimkî nameyê Hereketa Şêx Seîdî zî Hereketa Azadî bî. Ma na babete ser o zî do aşkerayêk bidî.”
