Kênaya Sirri Sureyya Onderî Ceren Onder Kandemîr ke demo ke Serekê Saadet Partî Mahmût Arikanî pîyê aye zîyaret kerd, qisey kerd û îfade kerd ke aye pîyê xo dîyo û rewşa pîyê aye ewro hîna baş a.
Parlamenterê DEM Partî û endamê Heyetê Îmraliyî Sirri Sureyya Ondero ke krîzê qelbî vîyarnayo, 2 rojî yo nêweşxaneyêkê taybet ê Stenbolî de yeno tedawîkerdene. Sirri Sureyya Onder vizêrî ra odeya pawitişê awarte de yo û rewşa ey a bi tehluke dewam kena. Hemserekê Pêroyî yê DEM Partî Tulay Hatîmogullari û Tuncer Bakirhan, Hemserekê Pêroyî yê Partîya Herêmanê Demokratîk (DBP) Çîgdem Kiliçgun Uçar û Keskîn Bayindir û xeylê parlamenterê DEM Partî nêweşxane de yê.
Saadet Partî Sirri Sureyya Onderî zîyaret kerd
Vizêrî ra zîyaretê partîyanê sîyasî, sazîyanê sîvîlan û hunermendan nêweşxane de dewam kenê. Saadet Partî zî nêweşxane de Sirri Sureyya Onderî zîyaret kerd û uca de doktor û hemserekanê DEM Partî reyde pêvînayîş kerd. Serekê Saadet Partî Mahmût Arikan îfade kerd ke o seba Sirri Sureyya Onderî duayan kenê û hêvî kenê ke demêko nêzdî de baş bo.
Rewşa Sirri Sureyya Onderî ver bi başîye şona
Kênaya Sirri Sureyya Onderî Ceren Kandemîr zî dîyar kerd ke aye pîyê xo dîyo û rewşa ey ver bi başîye şona. Aye bawer a ke pîyê aye do baş bibo. Pêvînayîşî ra pey Mahmût Arikanî eşkerayî daye û dîyar ked ke Sirri Sureyya Onderî waşt ke wexto ke weş bî her kesî bîyaro têhet, nêweşîya xo de zî her kes ame ey zîyaret kerd û vat ke ma hêvî kenê ke Sirri Sureyya Onder baş bibo û pîya aştî bîyarê ca.
