Cengiz Çiçekî ard ziwan ke semedê averşîyayîşê prosesî gamê ke gerek bêrê eştene est ê û vat,”Înan ra gama tewr muhîme aya ke azadîya fîzîkîye ya Birêz Ocalanî bêra caardene.”
Wekîlê DEM Partî Cengiz Çiçekî pêvînayîşê Heyetê Îmraliyî yê bi Rece Tayyîp Erdoganî erjna. Qiseykerdişê Çiçekî ra qismêk wina yê:
“Erdoganî ke vat ‘ez mutabakatê Dolmabahçeyî nas nêkena’ ewro heyetê Îmraliyî qebul keno. Têna no mojneno ke semedê averşîyayîşê prosesî no pêvînayîş tarîxî yo. Bi nê pêvînayîşî yeno famkerdene ke hinî Birêz Erdogan zî kewt mîyanê prosesî. Hinî wina yew tablo est o. Heme aktoranê eleqedaran, bitaybetî kesê ke îqtîdar û devletî temsîl kenê, înan dir pêvînayîş ame kerdene. Badê nê pêvînayîşan yeno pawitene ke semedê averşîyayîşê prosesî game pêtî bêrê eştene. Eke nika gama pratîk nêro eştene rayapêroyî hinî eciz beno.
Gama tewr muhîme aya ke azadîya fîzîkîye ya Birêz Ocalanî bêra caardene. Haştîye xora mabênê hêzanê ke şer kenê de bena. Selahîyetdarê PKK’yî vanê seba ke ê kongre bikerî gerek rayberê înan tewrê prosesê kongre bibo. Reyna semedê komkerdişê kongre gerek operasyonî bêrê vindarnayene. Nê dewrî de vera Başûrê Kurdîstanî û dormeyê ci bi hezaran operasyonî û hêrişê hewayî ameyî kerdene. Meseleya kurdan hinî meseleya heme merdiman a ke na herre de ciwîyenê. Çike meseleya kurdan hinî tesîrê her kesî kena.
Têkoşînê statuyî, têkoşînê estbîyayîşî, têkoşînê azadîye yê şarê kurdî tim standartê demokratîkî yê Tirkîya berz kerdî. Eke têkoşînê sahneyê tarîxî de sîyasetê kurdan, têgêrayîşê kurdan û ya zî têkoşînê kesanê ke çareserîya meseleya kurdan wazenê nêameyêne kerdene, belka na herre de semedê demokrasî û azadîye çîk nêbîyênî.
Coka her firset de îmtîhankerdişê DEM Partî û Têgêrayîşê Kurdan raşt nîyo. Xora xeyrê estbîyayîşê têkoşînê ma hema Tirkîya de hêvîya demokrasîyî ganî yena tepiştene. Ê ke wazenê DEM Partî goreyê menfeatê xo bigîrê dest xelet kenê. Ma goreyê menfeatê çewî tênêgêrenê. Ma rayîrê hîrêyîn ê. Ma sey Partî vat ma qeyûmê Wan, Dêrsimî, Colemêrgî senî ke sey xespkerdişê îradeyî vînenî, ma operasyonê vera Şaredarîya Îstanbulî, vera Îmamogluyî zî wina vînenî.”
