Kulturê Adaroke ke sey ameyîşê wisarî yeno pîrozkerdene 300 serrî yo dewam keno. Meryem Firat ke beşdarê şayîye bîye vat ke aye gedeyîya xo ra yo ke beşdarê pîrozkerdişê Adaroke bena.
Şaristanekê dewa Melî de her serre mabênê aşma adare û nîsane de seba ameyîşê wisarî pîrozkerdişê Adaroke ke wayîrê tarixî 300 serran a yena organîze kerdene. Adaroke tradîsyon û kulturêko xeylê kehen o. Goreyê tay kesan tarixê ci 300 serrî yo û tay kesî zî vanê hîna kehen o. La tarixê ci baş nêyeno zanayene. Na şayî taybetîyêka Şirnexî yanî herêma Botanî ya. Emserr zî hetê Şaredarîya Şaristanokê Dewa Melî ya Partîya Têduştî û Demokrasîyî ya Şaran (DEM Partî) ra tradîsyonê Adaroke mabênê Koyê Cûdî û Koyê Besta de bi programêk ameye pîrozkerdene.
Tradîsyonê 300 serran dewam keno
Her serre Şirnex û qezayanê ci ra bi hezaran kesî yenê beşdarê pîrozkerdişê Adaroke benê û nê tradîsyonê se serran Adaroke pîroz kenê. Şar pîya werd weno û kayanê gelêrîyan “guhgan”, “birgî”, “gulşek”, “kêlanî”, “kergî mela” kay kenê. Seba ke welatijî yenê têhet, germîyêk bena û xurtbîyayîşê komelî yê kehen xo mojneno. Reyna eke mabênê keyeyan de cigîrîyayîşêk est bo, pîrozkerdişêya Adaroke de pê yenê û mewsimê wisarî de rîpelêko newe akenê.
Mabênê Cûdî û Besta de ame pîrozkerdene
Pîrozkerdişê Adaroke verî ra dewan de ameyêne pîrozkerdene. Heme dewî Adaroka xo dewa xo de pîroz kerdêne û a roje cil belgê xo yê neweyî xoradayêne û ameyîşê wisarî pêşwazî kerdêne. La nê çend serrî yê Adaroke mabênê koyê Cûdî û Besta yê herêma Dewa Melêi de pîya yena pîrozkerdene. O ca zî taybetîyêka Botanî yo. Koyê Cûdî adresanê Botanî ra yew o. 15 rojan de reyêk herêmê Cûdî û Besta bi manayê ‘Ewleyîye’ yenê qedexekerdene. La tayê cayan de qedexe çin o. Emserr zî welatijan mabênê Koyê Cûdî û Besta de pîrozkerdişê Adaroke organîze kerd. Xozaya mabênê her di koyan de erjena merdim bivîno.
Gedeyîya xo ra beşdarê pîrozkerdişê Adaroke bena
Dayîka bi nameyê Meryem Firat ke her serre tewrê pîrozkerdişê Adaroke bena dîyar kerd ke a gedeyîya xo ra Adaroke sey ameyîşê wisarî pîroz kena û wina vat: “Wexto ke ma şenik bîyê ma xebikî viraştêne, ma keye pak kerdêne û cilê weşî xoradayêne. Ma dewa xo de Adaroke pîroz kerdêne. Ganî ma na aşme de yewbînan ra cigîrîyaye nêbê. Ganî ma cîran û merdimê yewbînan, yewbînan ra hes bikerê. Adaroke weşîya komelî ra yew a. Hetê ma de seba Adaroke vanê: ‘Aşma Adare de meleke dare ser o ra ameye war, qîrêk da wisarî û weşîye ameye dinya’.”
‘Ma do seba pawitişê tradîsyonanê herême xebatanê xo bidomnê’
Hemşaredarê Dewa Melî Ferît Artuç zî dîyar kerd ke ê seba ke tradîsyonê komelî bipawê sey şaredarî pîrozkerdişê Adaroke organîze kenê û vat: “Adaroke kulturêko qedîm o. Adaroke nameyê xo aşma adare ra gêno û sey ameyîşê wisarî yeno zanayene. Ma waşt ke ma aşma adare de pîrozkerdişê organîze bikerê la seba ke aşma Remezanî bîye, ma aşma nîsane de pîrozkerdiş organîze kerd. Adaroke pêkerdişê şarê Şirnexî xo reyde ana. Tîya de komelbîyayîşêko xurt vejîyeno orte. Verê cinî tewrê programî nêameyêne kerdene la nika cinî zî tewrê pîrozkerdişê Adaroke benê. Reyna seba ke ma tradîsyonanê herême bipawê, xebatê ma dewam kenê.”
