Rojnamegera JINNEWS’î ya hepsî Oznur Deger dîyar kerd ke dima qerarê hepsîkerdene îşkenceyêka sîstematîk ci ra ameya kerdene û wina va: “Hepisxaneyan merkezê zextî yê psîkolojîkî yê.”
Rojnameger Oznur Deger ke 7ê Sibate de Mêrdîn de bi îşkence ameybî destbendekerdene û dima bi îdiaya ‘propogandaya rêxistinî kerda’ ame hepiskerdene. Deger rewşa xo ya peynî ser o bi mektubêk MA’yî rê va.
Oznur Deger mektubê xo de ard vîr ke sereştişê keyeyî de berê keyeyî hetê polîsê Hereketa Taybet ra ameyo şikitiş, bi pirodayîşî ameya kelepçekerdene û demê destbendkerdene heta ke bîyarê hepisxaneyî îşkenceyêka sîstematîk ci rê ameya kerdene û wina va: “Sereştişê keyeyî de sey heyfgirewtişê hêrişê keyeyê ma kerdê, çikê ke bi huquqî bêro vatiş nîyo. Merdim ci ra bivajo îdianame, hezar şahid lazim a. Hewl dayî ke hesabê mi yê X’î ra îdianameyêk hadre bikerê. Cayê îdianameyêkî bivajê ‘fezlekeya polîsan’ raştir o.”
Oznur Deger mektubê xo de bal ant ser binpêkerdişê hepisxaneyî ra û dîyar kerd ke hepisxaneyo ke manena, Tirkîya de yewin Hepisxaneyê Cinîyan ê Ewleyîya Berze yo û 4 qawişê ci est ê la hema bivajî îmkanê resayîşî çin o û wina domna: “Ti sohbet çin o, tena qursê enstrumanî est o, encax 6-7 embaz eşkenî beşdar bibî, 6 odeyê şenik qinarê yewbînan ameyî rêzkerdene. Berê odeyan şana saetê 22.00î de bi awayêkî otomatik yenê girewtiş, sereyê to çik bêro çew nêeşkeno hetkarîya to bikero, çimkî beran kîlîtkerde yê. Bi pêroyî rewşa mi baş a, moralê mi zî weş o. Ez hewl dana ke pêvajo weş bi kar bîyara. Ez zafêr wanena, no ser waştişê ma yê tewro gird şar û civat wa azad bibê.”
