Hetkarê Serekwezîrê Eyaletê Hessenî Kawa Mansouri û Endamê Meclîsê Federalî yê Elmanya Armand Zornî Newroza şarê kurdî pîroz kerd. Zornî vat gerek hukmatê Tirkîya berpirsîyarîya xo bîyaro ca.
Hetkarê Serekwezîrê Eyaletê Hessenî Kawa Mansouri û Endamê Meclîsê Federalî yê Elmanya Armand Zorn ke tewrê Newroza Frankufurtî bîyî, derheqê Newroze û vendayîşê tarîxî yê Rayberê Şarê Kurdî Abdullah Ocalanî de ajansê ANF’yî rê qisey kerd.
Kawa Mansouriyî Newroza şarê kurdî pîroz kerd û nê vatî: “Ez her serre tîya de tewrê Newroze bena. Zaf kesê ke emser tewrê na festîvale bîyî, kulturê kurdan nas kenê. No zaf muhîm û rind o. Ez zî Îranî ra ya, komelê ma de no roşan cîya yeno pîrozkerdene. Coka semedê mi zaf muhîm o ke ez ewro tîya de ya.”
Armand Zornî zî vengdayîşo tarîxî yê Rayberê Şarê Kurdî Abdullah Ocalanî sey “gamêka bicesarete” pênase kerd û vat: “Gerek hukmatê Tirkîya berpirsîyarîya xo bîyaro ca ke dewamê na game bêra û verê aştî bêro akerdene. Elmanya tim mabênçêka hol a. Ma eşkenê nê hetî ra paştî bidê. Eke hewce bikero ma eşkenê pirdan ronê. Seba ke no proses bêro domnayene gerek hukmatê Tirkîya îradeyêko cîdî mojno. Gerek pêvînayîşî eşkera û pê gamanê pêtan berê kerdene ke semedê perûne aştî bêra caardene. Gama verêne ameye eştene la na qetî qêm nêkena. Têkoşînê kurdan îlham dano mi.”
