Kîvî Dostkîyî dîyar kerd ke proseso ke Rayberê Şarê Kurdî Abdullah Ocalanî bi girewtişê fikranê pêro partîyanê kurdan dayo destpêkerdene tarîxî yo û paştîdayîşê nê vengdayîşî wezîfeyêko neteweyî yo.
Aktîvîstanê sîyasîyan ê Başûrê Kurdîstanî ra Kîvî Dostkîyî derheqê vengdayîşê ‘Aştî û Komelo Demokratîk’ yê Rayberê Şarê Kurdî Abdullah Ocalanî de ajansê ANF’yî rê qisey kerd.
Dostkîyî ard ziwan ke vengdayîşê Rayberê Şarê Kurdî Abdullah Ocalanî hêvîyêka pîle mîyanê kurdan de viraşta û vat: “Serkewtişê nê prosesî waştişê pêro kurdan o. Nê vengdayîşî ra verî pêro partîyanê kurdan de pêvînayîşî ameyî kerdene û fikrê nînan ameyî girewtene. Heyetê Îmraliyî yê DEM Partî pêro partîyê Başûrî zîyaret kerdî.”
Dostkîyî dîyar kerd ke wezîfeyêko pîl keweno milê Serekê YNK’yî Bafil Celal Talabanî û Serekê PDK’yî Mesûd Barzanîyî ser o û vat: “Wezîfeyê partîyan o neteweyî yo ke paştî bidê nê prosesî. No paştîdayîş do bingeyê yewîya kurdan awan bikero. Başûr bi taybetî warê mîyanneteweyî de sey dewletêka xosere qebul beno. Seba ney zî mesuldarîyê pîlî kewenê milê partîyanê Başûrî ser o. Ganî pêro partîyê Başûrî hem hetê madî ra hem zî hetê manewî ra destek bido nê prosesî.”
