Nuştoxa Tunusije Zouhaour Mecherguî ke Newroza Amedî ya tarîxî taqîb kerd, da zanayîş ke ganî bi lez cewabê vengdayîşê aştî yê Abdullah Ocalanî bêro dayîş û vat, şer nê do muzakere aştî bîyaro.
Newroza tarîxî ya Amedî bi tewrbîyayîşê mîlyonan kesî pê ameye û waştişo ewilîn azadîya Rayberê Şarê Kurdî Abdullah Ocalanî bîye. Fransa, Katalonya, Ispanya, Îrlanda, Belçîka, Elmanya, Îtalya, Kenya, Çekya, Hîndîstan, Misir, Îran, Lubnan, Lîbya, Iraq, Tunus û Başurê Kurdistanî ra xeylê sendîkager û temsîlkarê sazgehê komelê sivîlî tewr bîyê.
Nînan ra yew zî nuştoxa Tunusije Zouhour Mecherguî bîye û aye çimdarîyê xo Ajansê Jînnewsî rê ardî ziwan.
‘Ez heyranê xoverdaşê cinîyan bîya’
Zouhaour Mecherguî çimdarîyê xo yê derheqê Newroza Amedî de vatî û wina dewam kerd: “Semedê famkerdişê meseleyê kurdî no seba mi îmkanêko hîra bî. Mi dî. Bi rastî pîrozbayîyêka zaf pîl bî û bi heybet bîye. Mi wina nêpawitêne. Çîyê ke mi eşnawitibî zaf cîya bîyê. Zaf weş bîye. Ez tesîrê ci de zaf menda. Xoverdayîşê cinîyan tesîrêko pîl mi ser de kerd. Ez heyranê xoverdayîşê cinîyan bîya.”
‘Ez vengdayîşî muhîm vînena’
Zouhaour Mecherguî bale ant vengdayîşê Rayberê Şarê Kurdî Abdullah Ocalanî û wina vat: “Ganî muzakere bêro kerdiş û problemî bêrê çareserkerdiş. No vengdayîş ma keyfweş kerd. Ma muhîm vînenê. Têkoşînê cinîyan her wareyî de est o. Semedê heqanê xo xo ver danê. Bi rastî mi Newroze de cinîyê xurtî dîyê. Ez zaf keyfweş bîya. Hêvîya mi zaf pîl bîye. Cinî xo pawenê, têkoşîn danê.”
‘Ganî no vengdayîş erdî de nêmano’
Zouhaour Mecherguî derheqê bêvengmedişê dewlete yê vera vengdayîşê Rayberê Şarê Kurdî Abdullah Ocalanî de zî qisey kerd û wina vat: “Ganî her kes goş bido vengdayîşê aştî û muzakere. No vengdayîş muhîm o. Hêvîya ma a ya ke Tirkîya masaya aştî de ronişa. Ma nê wazenê û nê pawenê. Ganî veng bidê aştî. Ganî bi lez cewabê nê vengdayîşî bêro dayîş.”
