Newroza Dêrsimî de qiseykerdişan de vera destbendkerdiş, tepiştiş û polîtakayanê tehdayî, vengdayîşê “xoverdayîşo hempar” ame kerdene.
Dêrsim de Meydanê Seyît Riza de Newroz ameye pîrozkerdene. Girseyo ke Kuçeya Hunerî de ame têhet, heta cayo ke Newroze do bêra pîrozkerdene rayîr ra şîyê. Pîrozbayî de zaf reyan sloganî “Jin Jîyan Azadî” û “Bijî Serok Apo” ameyê vatene. Polîsan waşt ke seba cil û belganê netewî astengî vejî la rastê reaksîyonî ameyê. Dimayî reaksîyonî ciwanan ke cilê û belgê netewî xoradaybî, dekewtê qade.
Hemsereka Şaristanî Dêrsimî ya DEM Partî Humeyra Yegîn qiseykerdişê xo de polîtîkayê îqtîdarî rexne kerdê û Newroze pîroz kerde. Bîrsen Orhana ke cayê aye de qeyûm ame tayînkerdene, vera tayînkerdişê qeyûman de reaksîyon mojna û vat: “Ma îradeyê şarî yê. Ma ameyê weçinitene û ma tîya de yê.” Hemşaredarê Şaredarî Cevdet Konak vera qeyûman reaksîyon mojna û vengdayîşê xoverdayîşo hempar kerd.
Vera destbendkerdişê Ekrem Îmamogluyî reaksîyon
Serekê Pêroyî yê Partîya Emekî (EMEP) Seyît Aslan vera destbendkerdişê Ekrem Îmamogluyî reaksîyon mojna. Aslan vat: “Seba ke qeyûm tayîn bikerê amadekarîyan kenê. Hemverê no îqtîdaro zalim ma do pîya xover bidê û serbikewê. Êyê ke wasîyîye ra behs kenê, 22 serrî de wasîyîya xo awan kerde. Hukm destê înan de, burokrasî destê înan de…Hema zî vanê Tirkîya de wasîyî est a. Xo belengaz kenê. Ewro heme sistemê hukmî bîyo sîyasî. Hukm bîyo hukmê AKP’yî. Vat ‘Tirewa pîle heqîbe de ya’, di hewte na qale ra pey Şaredarê Stenbolî yê Şaristanê Girdî Ekrem Îmamoglu destbend kerd.”
Vengdayîşê ‘têkoşînî’
Verfekê Demî yê Federasyonê Meclîsanê Sosyalîstan Mahîr Gurz ard ziwan ke ê do ‘têkoşînê xo yê azadîye” pîl bikerê. Endamê MYK’yî yê Esp’yî Orhan Çelebî wina qisey kerd: “hêrişêko pêroyî yê îqtîdarî seba kesanê ke ey rê muxalîf ê, est o. Ma pêro pîya proses o ke Rayberê Şarê Kurdî Abdullah Ocalanî Îmrali de seba awankerdişê aştîyêka demokratîke dayo destpêkerdene, vînenê. Ameyîşê ewroyî bêguman xo bi xo nêbi. Netîceyê têkoşînê birûmet yê 50 serrînî yê şarê kurdî yo no proses. Seba ke ma deskewteyanê şarê kurdî bipawê, ganî ma pê her di destan nê prosesî bipawê.”
Parlamentera DEM Partî Burcugul Çubuk wina vat: “Dêrsim sembolê sinifa karkeran, cinîyan, têkoşînê aştî yê şaran o. Eke ewro aştî yeno qiseykerdene, saya têkoşînê ma yo.”
Hemsereka Pêroyî ya Komela Elewîyan ya Demokratîke (DAD) Kadrîye Dogan dîyar kerd ke Newroza emserrî “Newroza Azadîye” ya.
Parlamentera Dêrsimî Ayten Kordu wina qisey kerd: “Ma hemrayê tornanê Seyît Riza yê. Ma do her tim erjanê xo bipawê. Şarê Dêrsim her tim hetê aştî, azadîye û edaletî de bi. Ewro ra pey zî do her tim nê rayîrî de dewam bikero.”
Dima ke adirê Newroze ame wekerde deyîrbazî Kadîr Çat, Cevdet Bagca û Quartet sehne girewt. Girse tewrê şîlîye zî demêko derg govende girewte.
