Seba ke Ekrem Îmamoglu, rojnameger û hemşaredarê qezayan ameyê destbendkerdene, hetê Hemserekanê DEM Partî yê Pêroyîyan Tulay Hatîmogullarî û Tuncer Bakirhanî reaksîyon nîşan da.
Serê sibayî Hemşaredarê Îstanbulî yê Şaristanê Girdî yê CHP’yî Ekrem Îmamoglu zî tede zaf kesî ameyî destbendkeriş. Serekê Dadgerîya Cumhurîyetî yê Îstanbulî îlan kerd ke sebebê destbendkerdişê Îmamogluyî “rayberîya organîzasyonê sûcî “, “endamtîya organîzasyonê sûcî”, “îrtîkab”, “ruşwet”, “saxteyîye”, “destfînayîşê bêhuqûqî yê datayê şexsî”, “fesat kewtişê îhaleyî” yê.
Hemserekanê DEM Partî yê Pêroyîyan Tulay Hatîmogullarî û Tuncer Bakirhanî hesabanê xo yê X (twitter) ra operasyonanê destbendkerdişî rê reaksîyon nîşan da.
Tulay Hatimogullari: Ma red kenê
Hemsereka DEM Partî ya Pêroyî Tulay Hatîmogullarî ke destbendkerdişan rê reaksîyon nîşan da, va: “Destbendkerdiş û operasyon huqûq nêşinasneno û sîyasî yo. No hukmat zerar dano komelî û yewbînan ra cîya keno. Hemşaredarê tewr girdî yê nê welatî ke bi tehdayanê sîyasîyan serê sibayî ame destbendkerdiş, na rîsîyayî do bi seyan serrî nêro vîrîkerdiş. No operasyono ke bawerîya edaletî şikneno, bi destê huqûqî dîzaynkerdişê sîyasetî yo.”
Hatîmogullarî ke venga verradayîşê derhalî yê Îmamogluyî û kesê ke reyde ameyî destbendkerdiş da, va: “Hewcedarîya Tirkîya çin a ke hemşaredarî serê sibayî polisan reyra bêrê destbendkerdiş. Hema zaf demokrasî û hema zaf huqûq lazim o.”
Bakirhan: Êrişê vera îradeyê şarî yo
Hemserekê DEM Partî yê Pêroyî Tuncer Bakirhanî va: “No operasyono ke Hemşaredarê Şaristanê Girdî yê Îstanbulî Ekrem Îmamoglu û hemşaredarî, rojnamegerî û sîyasetmedarê bînî ser o ameyo kerdene, êrişê vera demokrasî û îradeyê şarî yo. Ma na bêhuqûqîya ke vera îradeyê şarî virazîyaya, red kenê û bi hawayêko pêt protesto kenê. Ganî nê rayîrê xeletî ra peyser bêro agêrayene, îradeyê şarî rê hurmet bêro kerdiş. Ma sey DEM Partî, heme tehdayanê ke vera sîyasetê demokratîkî yê, ma do dewam bikê ke vera nînan de vindere. Ma îfade kenê ke ma şarê Îstanbulî reyde yê.”
