Komîteyê Amadekar ê Newroza Amedî ra Gulşen Ozer vat “Ma do Newrozêka tarixî pîroz bikerê. Ma veng danê heme şaran ke tewrê Newroze bibê.”
Bi pêşengîya Partîya Herêmanê Demokratîk (DBP), Hereketê Cinîyanê Azadan (TJA) û Partîya Têduştî û Demokrasîyî ya Şaran (DEM Partî) de seba Newroza 21ê adare ke do Amed de biba, beyanat da. Komîteyê Amadekar ê Newroza Amedî Newroza ke do bi slogananê “Raybero Azad Komelo Demokratîk” û “Seba Azadîye Komelo Demokratîk” bêra pîrozkerdene, awanîya Rêxistinê Şaristanê Amedî yê DEM Partî de beyanat da.
Waştişo bingeyîn: Azadîya Ocalanî
Hemserekê Şaristanê yê DBP’yî Mehmet Şîrîn Gurbuz wina qisey kerd: “Newroza emserrî Newroza azadîye ya. Şaristan û qezayan de ma Newroze pîroz kerd. Pîrozbayîyan de waştişo bingeyîn yê şarî komelo demokratîk û azadîya bîrêz Ocalan bi. Mesajê ma yo emserrîn do azadîya bîrêz Ocalan bo. Şarê kurdî û dostê înan do Newroza emserrî de waştişê xo yê aştî û azadîye berz bikerê. Seserrî yo ke şarê kurdî cuyêka seypê wazeno. Na Newroze de ma do cuyêka seypê awan bikerê. Ma do emserr bi rengê xo, ziwanê xo û bi mesajanê xo bi çoşêko pîl Newroze pîroz bikerê. Newroza emserrî wa biba wesîleyê azadîya birêz Ocalanî.”
‘Ma paweyê şaran ê ke bêrê qada Newroze’
Hemsereka Şaristanê ya DEM Partî Gulşen Ozer beyanatî de wina vat: “Waştişê Komelo Demokratîk û azadîye Newroza emserrî de vejînê vernê. Ganî ma seba awankerdişê cuyêka hempar û seypê bixebitîyê. Ma do Newrozêka tarixî pîroz bikerê. Ma vengdanê heme şaran ke tewrê Newroza Amedî bibê.”
Gulşen Ozer persê “Do mesajêko bi vîdeo est bo” rê cewabê “Haya ma ci ra çin a” da. Gulşen Ozer dîyar kerd ke do Newroze de surprîzî bibê.
