Bismil de pîrozkerdişê Newroze bi coş destpê kerd, qadê Newroze bi dirûşmeyê “Biciwo Newroz”, “Bijî Serok Apo” berz bî. Wekîlê DEM Partîye Serhat Eren bername de aşkera kerd ke ganî dewlete seba aştî û aramî, goş bîda vengdayîşê Bîrêz Ocalanî.
Ewro Newroz 10 merkezê de yena pîrozkerdene, nê merkezan ra yew zî Bismil o. Pîrozkerdişê Newroze yê qezaya Bismilî ya Amedî de bi dirûşmeyê “Rayberîya Azad Komelo Demokratîk” û “Seba Azadîye Komelo Demokratîk” destpê kerd.
Seba pîrozkerdişê kinarê Otogarê Bismilî, şarê qezaye saetê ser sibayî de bi cil û bergê xo yê neteweyî derbasî qadî bîyê. Qadê Newroze ke 7 serra ra hetanî 70 serra her kes kom bîyê, dirûşmeyê “Biciwo Newroz”, “Bijî Serok Apo” yenê berzkerdene. Bi seyan kesê ke qadê kom bîyê, Newroza xo bi govendî pîroz kenê.
Serekê Komîteya Tertîpî ya Newroza Bismilî Mehmet Şakîr Demîr qise kerd û va ke rojê tarîxî ra vîyarenê, eke na pêvajo ra bêra wayîrvejyayîş do no şar azad bibo.
Hemsereka Amedî ya DEM Partîye Gulşen Ozer zî aşkera kerdke vengdayîşê aştî ame û no ser zî 8ê Adare bi coş ê pîroz kerdê, ê seba aştî hadre yê.
Qanûno Bîngeyî de her kes ca bîgo
Wekîlê Amedî yê DEM Partîye Serhat Eren aşkera kerd ke Newroz tena roşanêk nîya, nuştişê tarîxê xoverdayîşî ya û wina va: “Birêz Ocalan 27ê Sibate de vengdayîşo tarîxî da. Ganî ma wayîrê nê vengdayîşî biwejê. Ma wazenê her kes bi reng, ziwan û kulturê xo Qanûno Bingeyî de ca bigo. Ganî seba ci zî dewlete zî wa gam bierza. Ganî seba seba aştî û aramîye goş bida, vengdayîşê Birêz Ocalanî.”
Peynî zî Koma Dilzar û Hunermend Azad Bedran vejîyayê sehne. Bernameyê Newroze bi coş û kelecanî qedîya.
