Şaristanê Mazlum Doganî de demê pîrozkerdişê Newroze de welatijan Mehmet Siddik Çelîkel û Îskender Şimşekî seba prosesê newî razîbîyayena xo arde zon û vatê: “Qey aştîyeka bi rumet ganî Rayberê Kurd ca de azad bibo.”
Awankerdoxê PKK’î Mazlum Dogan 21ê Adara 1982î de verba zilm û zordarîya dewleta tirke û Rayberîya Hepisxaneyê Hûmara 5. a Amedî de laşê xo da verê adirî û bî sembolê Newroza hemdemî û bi nameyê Kawa yo hemdem ame zanitene.
Vizêrî welatê Kawayê hemdemî Mazlum Doganî Dep de Newroz bi siloganê “Raybero Azad, Komelo Demokratîk” ame pîrozkerdiş.
Pîrozkerdiş de welatî Mehmet Siddik Çelîkelî seba vengdayîşê Rayberê Şarê Kurd Abdullah Ocalanî zerî weşîya xo nîşan da û ajansa ma rê nîya qesî kerd: “No mesajê 2025an yê Rayberê Şarê Kurd Abdullah Ocalanî qey Tirkîye û qey Rojhilato Mîyanên qey birayîye qey seyyewbînan qey aştîye mesajeka pîl a. Gereka însan rast fam bikero. Ma hêvî kenê ke mesajê Rayberê Şarê Kurdî Abdullah Ocalan hêlê her kesî ra rast yeno famkerdiş. Çike ino mesaj qey aştî zaf mesajêde muhim o.
Qey aştîyêka dewamkerdî û mendîye gereka gamî bêrê eştene. Hetanû nika miyanê şaran de çade çi persî vejîyê pêro dormalê masade amê çareserkerdene. Qey aye zî gerekî her di hêlan ra zî gerekî gamî bêrê eştiş ke aştîye maneyê xo bivêno. Ez înam kena ke gamî bêrê eştiş mesaj seba her hetî rindîye û nefes girewtişo. Seba naye zî gerê Rayberê Şarê Kurdî Abdullah Ocalan azad bibo. Azad bibo ke bieşkeyo aştîye aver bero.”
“Zerê zindanî de nêeşkeno vengê xo biresno şarê xo”
Welatij Îskender Şîmşekî zî fikir û omidê xo nîya ard ziwan: “În vengdayîşê Serekê Şarê Kurd Abdullah Ocalanî zaf rind bî. Şarê marê zaf weş ame û şarê ma zî vera cî weş nêzdî beno. Şar zaf kêfweş bî, pîya biyayene, aştîye bibo zaf zaf rind beno. Şarê ma pêro pîya semedê aştîye xebatek zaf rind keno.
Ma eger vazenê se ino proses avêr şiro ganî verî tayê qanûnî bêrê vurnayîş û Rayberê Şarê Kurdî Abdullah Ocalan rehet bişkîyo vatena xo vajo. Senên yew aştîye vazeno, seba şarê kurd û şarê tirk senên yew roja amayoxe wazeno gerê rehet vajo. Zerê zindanî de nêeşkeno vengê xo biresno şarê xo, înanê serê koyan rê, komelanê xo rê xebera bierşawo. Ganî cayê yê hîra û rehet bo, rehet bieşkeyo xo biresno şarê xo, şaranê bînan. Ganî azad bibo.
Zaf rind yew Newroz emser bena, Na Newroza azadîye ya. Şarê ma, partîyê ma seba azadîya xo, seba azadîya Rayberê xo xebetyenê. Pîya weşîye bero se zaf beno rind.”
