Meclîsê Şaredarîya Dêrsimî bi rojeva ‘qeyûm’ kom bî. Hemşaredarê Dêrsimî Cevdet Konak vat ke heta şaredarîya xo hewna tepa bigêrê do kombîyayişê xo bi beşdarîya şarî bivirazê.
22ê Teşîrîne de Şaredarîya Dêrsimî ra qeyûm ame tayînkerdiş. Nêrazîbîyayişê verba qeyûmî domyenê. Endamê Meclîsê Şaredarîya Dêrsimî kombîyayişê xo yê aşma kanûnî Sûkê Binerdî de viraşt. Hemşaredar Cevdet Konak, Wekîlê DEMî yê Dêrsimî Ayten Kordu, pêrabesteyê tifaqê Dêrsimî, rayedarê CHPî yê şaristan û zafêr welatijê beşdarê kombîyayişî bîyê.
Ma qebûl nêkenê
Rêxistinê CHPî yê şaristanî verba astengkerdişê verê şaredarîye de beyanat da. Serekê CHPî yê Dêrsimî Kemal Ozcan vat ke tayînkerdişê qeyûman teberê huquqî yo û dîyar kerd ke ê tayînkerdişê qeyûman qebûl nêkenê.
Peynîya beyanatî, beşdarê bi dirûşmeyan ver bi Sûkê Binerî ra meşîya. Sûkê Binerdî de kombîyayişê aşma kanûnî yê Meclîsê Şaredarîya Dêrsimî ame viraştiş. Endamê meclîsî bi sernameyî “qeyûm” pêşnûmeyêk pêşkêş kerdê. Pêşnûmeye de ame vatiş ke tayînkerdişê qeyûmî sey mudaxeleya verba heqê weçînîteye û weçînayişî de ame ercnayiş û ame vatiş ke do çinhesibnayişê îradeya şarî bi ti awayî nîno qebûlkerdiş.
Konak zî ser pêşnûmeya qise kerd û dîyar kerd heta şaredarîya xo hewna tepa bigêrê do kombîyayişê xo bi beşdarîya şarî bivirazê û ard ziwan kerd do Dêrsim firset nêdo zaliman û kombîyayişê bînî zî ê meclîsê taxe yê Gaznîk û Aksulukî de bivirazê. Konak vat ke êdî her cade û warê Dêrsimî de seba înan do bibê warê kombîyayişan û têkoşînê xo bidomîne, şaristan zî pîya rayîr biberê.
Peynî zî welatijî qise kerdê û kombîyayiş bi peynî bî.
