Teorîsyen Nîls Anderssonî vengdayîşê ‘Aştî û Komelo Demokratî’ yê Rayberê Şarê Kurd Abdullah Ocalanî erjna û vat: “Ocalan tarîx nuseno; tarîxê şarê kurdî nuseno.”
Teorîsyen, edîtor û nuştox Nîls Anderssono ke Rayberê Şarê Kurd Abdullah Ocalanî nêzdî ra şinasneno, derheqê vengdayîşê Aştî û Komelo Demokratîkî de ajansê ANF’yî rê qisey kerd.
Nîls Anderssonî adirbestê 2013î ard vîrî û vat: “Goreyê mi cigêrayîşê çareserî yê 2013î de û ewro Ocalan tarîx de têrî nêmend, eqsê ci tarîx nuseno. O tarîxê şarê kurdî nuseno. Çîyo ke ewro qewimîyeno, no yo.
Ocalan wazeno sey Rojawanî, Tirkîya de zî demokrasî awan bikero û şaranê bînan bîyaro têhet. Ez pê bawer a ke Ocalan do rayîrê aştî awan bikero. Ganî şarî goş bidê nê vengî.”
Nîls Anderssonî ard ziwan ke heqê kurdan çarçewa demokrasîyî de ganî bêrê dayene û vat: “Ewro çekveradayîşê PKK’yî yeno nîqaşkerdene. La vîzyonêkê PKK’yî û serkêşanê ci est o. PKK tena rêxistinêka çekdare nîya. PKK dewaya kurdan temsîl kena.
Eke rejîmo nikayên yê Tirkîya xo nêvurno, demokrasî do nêro. Seba ke PKK lîsteya terorî de yena veradayene, têgêrayîşê kurdan yenê sûcdarkerdene. Raştîye de Tirkîya terorîst a.”
Nîls Anderssonî peynî de nê çîyî vatê: “Şima keso ke zîndan de yo, ey reyde nêeşkenê muzekere bikerê. Ganî Ocalan azad bibo û wina tewrê muzakereyan bibo. Seba ke no proses serbikewo, no lazim o. Ganî Ocalan serbest bibo. Eke amanc prosesêko samîmî bo, demokrasî şert o.”
