Hemverfekê Komîsyonê Ziwan, Kultur û Hunerî yê DEM Partîye Heval Dilbahar dîyar kerd ke destbendekerdişê mamosteyê kurdkî yenê manayê destserkerdişê ziwanê kurdkî û netewa kurd.
Mamosteyê kurdkî Ronayî Onen, Samî Tan û Mevlut Aykoç bi îdiaya perwerdeyê ziwanê kurdkî dayê, kitabê perwerdeyê kurdkî “HÎNKER” çap kerdê, ameyê destbendkerdiş. Serdozgerîya Komare ya Îstanbulî cipersayîşî aver bena. Nêrazîbîyayîşê verba destbendkerdişê hîrê mamosteyan verdewam keno.
Hemverfekê Komîsyonê Ziwan, Kultur û Hunerî yê DEM Partîye Heval Dilbahar nêrazîbîyayîş nîşanî destbendkerdişê mamosteyê kurdkî da.
Vengê tarîxî naskerdişê azadî û heme ziwanan o
Heval Dilbahar ard ziwan ke çend roj verê bi nameyê “Vengdayîşê Aştî û Komelo Demokratîk” hamleyêka tarîxî ya serdemêkê newe ame destpêkerdiş û va ke bi no vengdayîş komelo demokratîk do bêro sazkerdiş. Heval Dilbahar dîyar kerd ke weş yeno zanayîş ke no vengdayîş mîyanê xo de naskerdiş û azadîya estbîyayîş û nasnameyê heme netewe, şar, kom, komel û dormeyan hewîneno û va: “Bêguman nasname, ziwan, kultur, bawerî, erdnîgarî û heme ercê netewe û koman pê yeno. No seba kurdan zî wina yo. Ziwan xetê kurdan o. No ser; seba ke hewldanê aştîyêka birûmet û awankerdişê komelêko demokratîk şîrî serî wa verê her çikî heme qedexekerdişî, zext, zordarî, sînor û dorpêçê ser kurdkî hem qanûnan de hem zî warê cuya de bêrê hawanayîş; wa kurdkî bibo wayîrê statu û ziwanê perwerdeyî. Wa kurdkî her warî de cuyaya serbest û azad bo. Wa weş bêro zanayîş ke nêzdîbîyayîş seba ziwanê kurdkî eynî demî de nêzdîbîyayîşê seba aştî, azadî û demokrasîye nîşan dano.”
Verdewamîya polîtîkayê înkarî ya
Heval Dilbihar destnîşan kerdke desteserkerdişê nê mamosteyê kurdkî desteserkerdişê ziwanê kurdkî yo û wina va: “No zî manayê destserkerdişê neteweya kurd, bêguman no kerdoxo ke rasteraşt hewldanêkî verba hamleya aştî û komelo demokratîk o, newekerdişê polîtîkayê klasîk ê 10 serran ê çinhesibnayîşî yê. Qedexekerdiş, asîmîlasyon, helenayîş û werte ra hawanayîşê ziwan, kultur û ercê bengeyî bîn ê neteweya kurd ê. Kerdoxê wina bi ti awayî nînî qebulkerdene; şermezarî, rîsîyakerdişê gird ê; binpêkerdişê ercê merdimîyîye yê. Wa mamosteyê ziwanê kurdkî bi lezûbez bêrê serbestveradayîş.”
