Şaredarîyanê DEM Partî bi ferasetê şaredarîya “Azadperestîya cinîyan, demokratîk û ekolojîke” 31ê adare 2024î ra heta nika 122 sazîyê cinîyan akerdî û bi seyan têgêrayîşê cinîyan viraştî. Bi nê xebatan resayê 25 hezar cinîyan.
Serranê verênan ra warê îdarekerdişê herêman de cinî nêameyêne temsîlkerdene. Rayîrê ewleyî, kreş, cayê xopawitişî û cayê komelkîkerdişî seba cinîyan çin bî. Na rewş 1999î de bi aktîvîteyanê cinîyanê kurdan, cinîyan dest bi bedilnayîşî rewşan kerd. Paradîgmaya “Azadperestîya cinîyan, demokratîke û ekolojîke” reyde sistemê hemserekî bî destkewteyê temsîlkerdişê cinîyan.
Serra 2024î de DEM Partî 75 şaredarî qezenc kerdî û 73 heban de cinî bîbî hemserek. Xebatê cinîyan vêşî bîyî û estbîyayîşê înan ame vînayene.
Şaredarîyê DEM Partî, merkezê hemkarîya cinîyan, merkezê kedê cinîyan, xetê şîdetî, kîtabxaneyê cinîyan, mudirîyê cinîyan, cayê piştîdayîşî, cayê arisîyayîşî, atolye, merkezê sporî yê cinîyan, merkezê cuye yê domanan, kreşê zafziwanî, mudirîyê têkoşînê şîdetê cinîyan û merkezê arisîyayîşê cinîyan û sey nînan xeylê projeyê ameyê kerdene.122 hebî sazîyê cinîyan ke qeyûm bê fonksîyon verdayê, ameyê akerdene. Ney reyde hem seba cinîyan karî vejîyenê hem zî problemê înan yênê çareserkerdene. Şaredarîyî bi nê xebatan resayê 25 hezarî ra vêşêr cinîyan.
Hemsereka DEM Partî Gulistan Atasoy va ke demê qeyûman de merkezê cinîyan ameybî girewtene, cinî dekewtibî keyeyan û şîdet hîna bî zêde. Atasoy va: “Ma nika newe ra dest bi awankerdişê sazîyan kenê. Ma kîşta cinîyan de yê. Nuqtaya ma ‘Vatişê ma nêqedîyayo, ma do pîya şîdetî vindarnê’ ya.”
Atasoy dewam kerd: “Cayê ke cinîyan 8 serrî ra ver tira vîyartê, uca nika nêaseno. Gere ma cayê pêameyîş, xo îfadekerdiş û komelkîkerdişê cinîyan newe ra awan bikerê. Bi taybetî proseso ke Rêzdar Ocalan dayo dest pêkerdene, rolêko taybet dano cinîyan ke aştî û demokratîkbîyayîşê Tirkîya ser o tesîr bikê.”
