Skandalê kopyaya bi zîrekîya viraştîye ke verê îmtîhananê kewtişê unîversîte vejîya meydan, bî sebebê îstifaya Wezîrê Perwerdeyî yê Koreya Başûrî Choi Kyo-jinî. Îmtîhanan de 111 îhlalê ke bi hacetanê elektronîkan ra girêdaye yê ameyî tesbîtkerdiş.
Wezîrê Perwerdeyî Choi Kyo-jinî badê skandalî 22ê teşrîna peyêne de îstifa kerd. Serekkomar Lee Jae-myungî zî îstifa qebul kerde.
Skandal 15ê teşrîna peyêne de vejîya meydan. Namzedêko ke musabeqayêke de bîbî yewin, îtîraf kerd ke bi rayîrê kamera û telefonî zîrekîya viraştîye ra ardim girewto. No hedîse çar rojî verê îmtîhanê kewtişê unîversîte bî, ke nêzdîyê nêm mîlyon wendekarî tewrê ey benê. Nê çîyî ser o dorûverê merkezanê îmtîhanî de girêdayîşê Wi-Fi ame birnayîş. Ame vatiş ke kesê ke kopyakerdişî xeber bidê, înan rê do 68 hezar euroyî xelate bêro dayîş.
Cewabê Wezîr Choi yo ke parlamento de da persa ke “Gelo do eşkayî kesanê ke kopya kenê tesbît bikerê yan nê?”, bî sebebê nêrazîbîyayîşan. Choiyî vatbi: “Sebebê emrê xo ra ez bawer nêkena ke ez do no çî bieşkî bikerî.” Wezîr rojanê dimayênan de tewrê kombîyayîşanê çapemenîye zî nêbî.
Îmtîhanê kewtişê unîversîte yê roja panşeme de 111 îhlalê ke bi hacetanê elektronîkan ra girêdaye yê ameyî tesbîtkerdiş. Ame vatiş ke nêmeyê nê hedîseyan de wendekaran telefonê xo teslîm nêkerdê û nê hacetî bi rayîrê mesajanê elektronîkan ameyê tesbîtkerdiş.
Choi hesabê xo yê X’î ser o eşkerayîyêk da û dîyar kerd ke îmtîhan bê hedîseyêko pîl qedîyayo la o derheqê rexneyanê kêmanîyanê hedrekarîye de mesul o û wina va: “Seba ke îmtîhan nika qedîyayo, ez heme mesulîyetê çîyanê ke bîyê gêna xo ser û îstifaya xo pêşkêş kena.”











