Badê krîz û îxtîlafanê ke derheqê kombîyayîşê Parlamentoyê Herêma Kurdîstanî de vejîyayî, mektebê sîyasî yê YNK û PDK’yî ewro pêvînayîş kerd. La heta nika her di hetan zî tu eşkerayîye nêdaya.
Demêk verê cû binaya Mektebê Sîyasî yê YNK’yî ya Hewlêrî de heyetanê YNK û PDK’yî kombîyayîşêk kerd.
Kombîyayîş asta mektebanê sîyasîyan ê her di partîyan de bî. YNK’yî ra Dr. Rêwaz Fayîq û Dr. Yusif Goran, PDK’yî ra zî Piştîwan Sadiq û Mehmûd Mihemed tewrê kombîyayîşî bîyî.
Demêk verê cû heyetanê YNK û PDK’yî Hewlêr de, binaya Mektebê Sîyasî yê YNK’yî de kombîyayîşêk kerd. La heta nika her di hetan zî derheqê kombîyayîş û zerreyê ey de tu eşkerayîye vila nêkerda.
Ganî bêro vatiş ke 4ê teşrîna peyêne de PDK’yî bi tena serê xo kombîyayîşo verên ê temamkerdişî yê Parlamentoyê Herêma Kurdîstanî kerd û heyetê serekîye weçîna. No çî bı sebebê reaksîyon û nêrazîbîyayîşê yê YNK.
Serekê YNK’yî Bafil Talebanî bi nameyê Meclîsê Serekîye yê YNK’yî mesajêkê vîdeoyî de da zanayîş ke YNK hukmatê Herêma Kurdîstanî yo ke wextê ey qedîyayo ra vejîyaya. Bafil Talebanî îqaz kerd ke eke PDK serekê herême, serekê hukmatî û her wezîrêk tayîn bikero, YNK zî do Silêmanî de tayîn bikero.
Dima 10ê aşme de YNK û Nifşê Nû derheqê kombîyayîşê parlamentoyî de Mehkemeyê Federalî yê Berzî rê şikayet kerd. Înan waşt ke hem karê parlamentoyî bêrê vindarnayîş hem zî a roniştişe bêro betalkerdiş.
Mehkemeyê Federalî zî 15ê na aşme de qerarê tedbîrî yê şikayetnameyî ke seba vindarnayîşê karanê parlamentoyî bî, betal kerd la şikayetname bi xo sey xo mendo.











