Serekê Meclîsî Numan Kurtulmuşî bi beyanatêk da zanayene ke ê do demo tewr rewî de Komîsyonê Çimdarîye yê Meclîsî awan bikerê û wina vat: “Badê ke Komîsyon ame awankerdene do xebatanê çimdarî bikero û xebatanê sey pêşnîyazan komel û sazgehanê berpirsîyaran reyde pare bikero. Demo tewr nêzdî de Komîsyon do dest bi xebatan bikero.”
Serekê Meclîsî Numan Kurtulmuşî derheqê Komîsyonê Çimdarîye yê Meclîsî de ke çarçewaya Prosesê Aştîye û Komelê Demokratîkî de do Meclîs de bêro awankerdene, Meclîs de konferansêkê çapemenîye da. Numan Kurtulmuşî dîyar kerd ke ê seba awankerdişê komîsyonî resayê merheleya peyêne û wina vat: “Ma no proses bi serkewtişêko gird hetanî na merhele ard. No proses tena meseleya yew partî û sîyasetî nîyo. No proses projeyê dewlete yo û piştîdayîşê şarî zî seba nê prosesî est o.”
‘Ganî tu kes prosesî ser o hesaban nêkero’
Numan Kurtulmuşî vat: “Nê prosesî de Tirkîya ra teber çimêko hîrêyin çin o. Yanî dewletêka teberî çimdarî nêkena; çimdarîya prosesî şar û Meclîs kenê. Xebatanê komîsyonê Meclîsî yê parî de zaf waranê cîyayan ê komelî ameyî û qisey kerd û raporêk ame amadekerdene. No rapor xerîteyê rayîrî yo. Tebaxe de zî qanûnê çarçewayî Meclîs de ame tesdîqkerdene. Dima heyetêk bi serekîya Hetkarê Serkomarî Cevdet Yilmazî ame awankerdene û dest bi xebatan kerd.”
‘Komîsyon do demo tewr nêzdî de dest bi xebate bikero’
Numan Kurtulmuşî dîyar kerd ke goreyê qanûnî Komîsyonê Çimdarîye yê Meclîsî zî do dest bi xebatan bikero û wina dewam kerd: “No Komîsyon do bi nameyê şarî çimdarî û taqîb bikero. Wezîfeyanê nê Komîsyonî yê girdan ra yew zî no yo ke do bi hawayêko şefaf komelî agahdar bikero û piştîdayîşê şarî xurt bikero. Verê heme çîyan do qerarê qaîde û esasan bigîro; yanî do dîyar bikero ke kamcîn xebatan bikero.”
‘Ganî herkes ziwanê xo rast bikero’
Numan Kurtulmuşî persê rojnamegeran ser o da zanayene ke ê do demanê ameyoxan de goreyê pêkerdişê partîyanê sîyasîyan hûmara endamanê Komîsyonî zî dîyar bikerê. Ey dîyar kerd ke heqê tu kesî çin o ke zerar bido prosesî û qanûnê çarçewayî hîrê garantîyan dano û wina vat: “Yew tesbît û teyîd o; no garantîyêko gird o. Yewo bîn heyeto ke binê serekîya Hetkarê Serkomarî de yo. Hîrêyin zî Komîsyonê Çimdarîye yê Meclîsî yo. Ganî herkes ziwanê xo rast bikero û ezberanê sîyasîyan ê verênan ra fek verado. Ganî ma yewîya xo xurt bikerê.”











