Şaredarîya Peyasî seba mamostayanê dezgehanê perwerdeyî yê Zarokîstanî yê bi nameyê “Xalxalok” û “Perperike” yê ke binê Mudirîya Karanê Kultur û Komelkî de fealîyet kenê, programêkê perwerdeyî yê di rojan viraşt ke seba mamostayanê ke dezgehanê kreş, merkezê pawitîşê domanan û odayanê kayan de wezîfe kenê.
Perwerdeyo ke banê şaredarîye de ame kerdene; hetê Mudirîya Pawitiş û Averberdişê Ziwanî û Mudirîya Polîtîkayanê Cinîyan ra ame kerdene. Roja verêne ya perwerdeyî de, personelê Mudirîya Pawitiş û Averberdişê Ziwanî; babetanê sey Werdişê Ziwanî de Çar Hunerê Bingeyênî û Mîyanê Sinifî de Îdareyê Krîzî de melumatî neql kerdî û hetê ewnîyayîşî yê cîya cîyayî pêşkêş kerdî. Roja dîyine de zî personelê Mudirîya Polîtîkayanê Cinîyan, Heskerdişê Bedenî û Mahremîyetê Domanan ser o pêşkêşî kerdî.
Amancê bingeyin ê nê perwerdeyan, bi xurtkerdişê zanayîş û huneranê mamostayanê Zarokîstanî, perwerdeyê domanan de tetbîqkerdişê metodanê neweyan û bitesîran o. Mudirîya Kultur û Karanê Komelkîyan a Şaredarîya Peyasî da zanayene ke ê do programê perwerdeyî yê ke mabênê domanan û mamostayan de têkilîyêka hemhengîye awankerdiş û averberdişê na têkilîye hedef kenê, demo ameyox de zî dewam bikerê.
















