Wan – Serekê Odaya Tabîban a Wan û Colemêrgî Prof. Dr. Harun Arslanî dîyar kerd ke çareserîya krîzî bi awankerdişê nêweşxaneyanê neweyan ney, bi polîtîkayanê raşt û demdergan mumkin a û vat: “Ganî xizmetê weşîye yê pawitoxî bêrê xurtkerdene.”
Herêma Serhedî de xizmetê weşîye zaf qels o û zaf hemwelatî nêşênê nê xizmetî ra feyde bigîrê. Bitaybetî Wan de ke herême de bîyo merkezê nêweşxaneyan, kêmanîya personel û doktoran, erey girewtişê randevûyan û kêmanîya hacetanê weşîye hemwelatîyan mecbur verdanê ke şêrê bajaranê rojawanê Tirkîya. Harun Arslanî problemê weşîye yê bajaranê herême û pêşnîyazê xo yê çareserîye ajansê ma rê vatî.
Arslanî dîyar kerd ke kêmanîyanê girdan ê herême ra yew kêmanîya doktoran a û Wan, Gever, Colemêrg û Şemzînan de sere de beşê gedeyan zaf waran de kêmanîyêka girde est a. Ey wina vat: “Sebebê şertanê giranan ra doktorê ke est ê zî herême de nêmanenê û koç kenê. Nufûsê herême reseno 3-4 mîlyonan û no beno sebebê qelebalixîyêka girde ya kapasîteyî ser o. Nêweşî rasterast şinê nêweşxaneyanê sewîyeya hîrêyine û kapasîteyê nînan zî bes nêkeno.”

Arslanî vat ke Wan bajaranê cîranan reyde xizmetê weşîye dano nufûsêkê nêzdîyê 3-3,5 mîlyonî la bajar de tena di nêweşxaneyê pêroyî yê sewîyeya hîrêyine est ê. Ey wina dewam kerd: “Nêweşxaneyêkê ma yo sewîyeya dîyine çin o. Hûmara muracatanê polîklînîkî yê rojaneyan ê her di nêweşxaneyan tayê rey resena 20 hezarî û xizmetê weşîye yê lezabezî zî rojane resenê 2 hezar û 500î. Kapasîteyê nê her di nêweşxaneyan nêşêno nê barî wedaro.”
Arslanî bale ante ser o ke krîzê sîstemê weşîye netîceyê polîtîkayanê xeletan ê serranê dergan ê û wina vat: “Awankerdişê nêweşxaneyan û sermîyangozarîyê teknîkî tena bi xo nêbenê çareserî, tena şênê bibê parçeyêkê çareserîye. Helbet ganî xizmetê tedawîkerdoxî bibê la ganî tedawî ra averêr xizmetê xopawitişê nêweşîyan ra aver şêro.”
Arslanî derheqê doktoranê keyeyî de vat ke bingeyê weşîya pawitoxe xizmetê sewîyeya verêne yê û ganî nufûso ke doktoranê keyeyî ser o yo bêro kêmkerdene, giranî bêro dayene xizmetanê pawitişî yê warî û sewîyeya verêne ra ver bi sewîyeya dîyine û hîrêyine sîstemê sewqî bibo.
Arslanî vat ke Odaya Tabîban a Wan û Colemêrgî rêxistinêka meslekî ya ke nêzdîyê hezar û 200 endamê xo est ê û wina peynî ard: “Şertê tekane yê awankerdişê komelêkê weşî tena sîstemêko baş ê weşîye nîyo. Keyeyê munasîbî, werdo bes û bikalîte, xebata şertanê munasîban de û perwerdeyê şûurê weşîye zî tesîr kenê weşîye ser o. Coka komelanê ke krîzê ekonomîkî tede est o de temînkerdişê weşîye zî zaf zehmet o.” Ey da zanayene ke sey Yewîya Tabîbanê Tirkan do dosyayêk Wezaret û çapemenî reyde pare bikerê.











