Zubeyda Geylanî serrgêra kiştişê lajê xo Abdulhaluk Geylanîyî de ke 15ê teşrîna peyêne 2005î de Gever de hetê polîsan ra ame kiştene, dîyar kerd ke 21 serrî yo kiştoxê lajê aye nêameyê hukmkerdene û venga edaletî da.
Qezaya Şemzînanî ya Colemêrgî de 9ê teşrîna peyêne 2005î de hêrişê hêzanê dewlete yê Kitabxaneya Umutî ser o ra pey heme şarê herêma Colemêrgî werişt payan û vera şerê taybetî û provokasyonanê ke bi nameyê dewlete yenê kerdene, cewab da. Welatîyê Geverî zî bi rojan vejîyayî meydanan û vera şerê taybetî cewabê xo ardî ziwan. Teşrîna peyêne ya 2005î de netîceyê hêrişê polîsan de ciwanê 21 serreyî Abdulhaluk Geylanî ame kiştene. Birayê Abdulhaluk Geylanîyî Kaya Geylanî (Cîlo Gever) ke endamê Têgêrayîşê Azadîya Kurdîstanî bî, mîyanê têkoşînê gerîla de ganê xo ra bîyo.
Zubeyda Geylanî ke dayîka her di şehîdan a, serrgêra kiştişê lajê xo Abdulhaluk Geylanîyî de da zanayene ke 21 serrî serebûdî ser ra vîyartî la hema zî kiştoxî nêameyê hukmkerdene.

‘Şima çira lajê mi kişt?’
Zubeyda Geylanî dîyar kerd ke lajê aye karkerê sîwaxî yê înşaetî bî û bi hêrişê polîsan ame kiştene. Zubeyda Geylanî da zanayene ke Abdulhaluk a roje zî înşaet de xebitîyayêne û wina vat: “Wexto ke ame kiştene zî cilê karî ey ra bî. Ey çîyêk ra haydar nêbî. Ma rê xeberêk ame ke Gever de birîndar bîyo. Embazanê ey bi erebeya xo berdbî nêweşxane la rayîr de zaf ereyî mendbî çunke ambûlans nêamebî. Cenazeya Halukî berdbî nêweşxaneyê Wanî, ma uca ra girewte. Haluk yewo bêsûc û feqîr bî; ne mîyanê şerî de bî, ne zî kardîya ey û çekê ey estbî; heqê înan çin bî ke lajê mi bikişê. Wexto ke ma cenazeya xo girewte înan ma rê zî heqaret kerd. Dejêko zaf giran o ke lajê merdimî çimanê merdimî ver weş şêro û merde agêro. Ma zaf dejayî û sebebê nê dejî ra nêweş kewtî. Şima çira lajê ma yo bêsûc kişt?”
‘Ma dejê xo reyde mendî’
Zubeyda Geylanî da zanayene ke kiştişê Abdulhalukî ra pey ê dejê xo reyde tena mendê û derheqê serebûd û kiştoxan de tu cipersayîş nêameyo destpêkerdene. Zubeyda Geylanî dîyar kerd ke ne dewa abîye ne zî kes ame hukmkerdene û wina dewam kerd: “Ma nêwêrayêne veng bikerê û dej û kulê xo reyde mendî. Dewlete nêvat ke înan senî û seba çi kişt. Ma do her tim nê dewa taqîb bikerê heta ke eşkera bibo. Gedeyê ma ameyî kiştene, ma heqê gedeyanê xo wazenê.”
‘Eke şima wayûbirayîye wazenê ganî heqanê ma nas bikerê”
Zubeyda Geylanî ke nê şerê 50 serreyî de seba aştî û edaletî di gedeyê xo vindî kerdê, qiseykerdişê xo wina qedêna: “Ma aştî wazenê û ma wazenê ke nê ra pey azad bibê. Ma sebebê gedeyanê xo ra zaf dejayî; ma wazenê ke nê ra pey no dej nêkewo mîyanê ma. Vanê ‘Kurdî birayê ma yê’; eke şima wayûbirayîye wazenê ganî şima heq û huqûqê ma nas bikerê. Hema zî hepsîyê ma zîndanan de yê. Na wayûbirayî nîya. Ez wazena ke berê hepisxane û zîndanan abê. Eke şima wayûbirayîye wazenê ganî şima destê ma bigîrê û azadîye aver berê.”











