Êlih – Welatij Mûsa Tan, verê çend rojan vernîya keyeyê xo de hetê kes yan zî kesanê nasnameyê înan ne dîyar o bi çek ame kiştene. Kênaya ey Fatma Tan ard ziwan ke ey do bikewê pey na hedîse de bê û dîyar kerd ke ganî rayedarî serê hedîse de vinderê û hedîse zelal bikerê.
Mûsa Tan o 70 serre yo ke Êlih de ciwîyayêne, 7ê tirmehe de badê nêmrojî keyeyê xo yê Taxa Hîlalî ya Êlihî vejîyeno teber, kuçe de hetê kes, yan zî kesanê ke nasnameyê înan dîyar nîya, rastê hêrişêke çekdarî amebî û bi giranî birîndar bîbî. Musa Tan hewanabî Nêweşxaneyê Perwerde û Cigêrayîşî yê Êlihî û tewlê heme mudaxaleyan zî cuya xo ra bîbî. Cinazaya Mûsa Tanî Goristanê Girbereşk de ame definkerdene. Tezîyeya ke seba Mûsa Tanî vizêrî Taxa Beşevler de ameya ronayene do siba biqedîyo. Cigêrayîşo ke derheqê hedîse de hetê Serdozgerîya Komare ya Êlihî ra ameyo dest pêkerdene dewam keno. Kênaya Mûsa Tanî, fatma Tan derheqê kiştişê pîyê xo de ajansê ma rê qisey kerd.
‘Pîyê mi vat ‘mi kes nêdîyo’
Fatma Tan ard ziwan verê ke hedîse bêro sereyê pîyê aye, ey heme sey keyeyî banê xo de roniştebî û wina qisey kerd: “Pîyê mi nimajê xo yê nêmrojî kerd û bado vejîya teber. Semedê ke saeta ey vejîyayîşê teberî dîyar bî, her tim saete dîyina de vejîyayene teber. Badê ke keye ra vejîya panc deqîqeyî nêkewt mabên, di gedeyanê taxe ameyê verê berî û birayê mi ra vat; ‘hinî kesan hêrişê pîyê şima kerdo û pîyê şima kewto erd.’
Heta ma şîyê cayê hedîse, cîrananê ma ey berdbî nêweşxane. Ma zî dima ey şî û ma resayê ci. Wexto ke ma şîyê nêweşxane hinî ekîbê polîsan uca de bî û tira persayê, ey zî vat; ‘mi kes nêdîyo.’ Dima ma zî tira pers kerd, ma ra zî vat ‘mi kes nêdîyo.’ Badê ke emelîyat derbas kerd ez û birayê xo ma şî verê ey, heta o wext zî hişê ey sereyê ey de bî. Kuçe de kesêke çin bî. Xora nê saetan de germ ra taxe bêvenge bî. Heta nika ma nêeşnawito ke pîyê mi û kesêke pirodayo û ma wayîrê neyarî zî nîyê.”
‘Heta dewlete zelal nêkero ma do nêvinderê’
Fatma Tan waşt ke rojêke leze edalet bêro caardene û wina vat: “Ma wazenê xo teslîmê edaletî bikerê. Semedê ke barê ma girano û êş ê ma zî zaf o, ma wazenê demêko nêzdî de na hedîse zelal bibo. Vanê her roje ekîbî taxe de yê, la ma zî bi şînê xo meşgulê. Badê ke ekîbî tîya yê ganî hêriş zî vejê meydan. Ma vanê ke şikê ma kesî ra bibo, o zî çin o. Ewro şînê ma ronayeyo la meşte ma do dest cigêrayîşê edaletî bikerê. Eke nêvejîya pakîye ma do, o wext çîyêko bîn bifikirî yê. La bi hawayêko yeno vatene mesafeyêko gule ginayê zaf dûr bîyo. Tena mabên de sey des metreyan mesafe bîbî. Seba ke mesafe ende tay bîyo guleyê ke ginayê piro zî vejîyayê teber. Ma do dest dewa ra veranêdê. Pîyê mi kesêko wina qij nêbî. O pîyê erjan bî. Heskerdişê ey zerrîya zafê kesan de bîbî, Naye ra ma do zî heta peynî dima na hedîse de bê. Kamî kerdo, heta dewlete zelal nêkero ma do nêvinderê.”
