DFGê bertek nîşanî tayînkirina qeyimê ser Sozcu TVyê da û diyar kir ku hedef girtina saziyeke medyayê û tayînkirina qeyim nayê qebûlkirin û got: “Em ê li dijî zextên li ser rojnamevan û saziyên medyayê, piştevaniyê mezintir bikin.”
Polîsan vê şeveqê bi ser avahiya Sozcu TVyê girt û derbarê rêveberên televîzyonê Fûnda Sidali, Mûstafa Asim Akgul, Îsmaîl Oz û Yonca Yucekalelî de biryara binçavkirinê hate derxistin. Polîs li qanalê lêgerîn kir û nehişt ku xebatkarên qanalê bikevin avahiyê. Serdozgeriya Komarê ya Stenbolê derbarê operasyonê de daxuyanî da û diyar kir ku Fona Sîgortiya Mevduatê ya Tasarrufê (TMSF) weke qeyim tayînî ser televîzyonê hatiye kirin.
Komeleya Rojnamegeran a Dîcle Firatê (DFG) li dijî tayînkirina qeyimê li ser Sozcu TVyê li ser hesabên xwe yên medyaya dijital daxuyaniyekî nivîskî da û bertek nîşanî tayinkirina qeyim da.
Daxuyaniyê DFGê bi vî rengî ye:
“Sergirtina polîsan a ser Sozcu TVyê, binçavkirina rêveberên qanalê û tayînkirina qeyimê ser Sozcu TVyê bûyerekî nû ya xeleka polîtîkayên zextê yên li ser azadiya çapemeniyê ya li Tirkiyeyê ye. Di serdemeke ku zextên siyasî yên li ser rojnamegeriyê giran dibin de, hedefgirtina saziyeke medyayê û tayînkirina qeyim nayê qebûlkirin. Destwerdana li xwedî û rêveberiya saziyên medyayê, ne tenê li dijî mercên xebatê yên rojnamegeran e, her wiha li dijî mafê civakê yê agahdarbûnê û gihîştina agahiyan e.
Mudaxileyên li saziyên medya û rêveberên wan ne tenê li dijî rojnamegeriyê ye, li dijî mafê xwegihandina agahîgirtinê ya gel e. Mudaxileya ku bi TELE 1ê dest pê kir, bi HALK TVyê berdewam kir û îro jî bi Sozcu TVyê hate domandin, ev zext encama zîhniyeta ku azadiya çapemeniyê dike armanc e.
Em wekî Komeleya Rojnamegeran a Dîcle Firatê serdegirtina li ser Koma Medyayê ya Sozcu û tayînkirina qeyim şermezar dikin. Em daxwaz dikin ku rêveberên hatine binçavkirin tavilê bên berdan, dev ji sepana qeyim bê berdan û ji prensîbên hiqûqa demokratîk ên ku azadiya çapemeniyê misoger dikin re rêz were girtin. Em ê li dijî zextên li ser rojnamegeran û saziyên medyayê, piştevaniyê mezintir bikin.”













