Girewteya neweşe Newroz Bozkurte seba ke rewşa neweşîya aye giran bîya, ravaznaya neweşxane. Bozkurte, ke nêzdîyê 28 serre yo hepisxane de ya, neweşîya Lenfositik Losemîya Kronîk a ci de est a. Newroz Bozkurte, ke neweşxanî de tedawî bena, rewşa aye a xeternake dewam kena.
Girewteya neweşe Newroz Bozkurte, ke Hepisxanê Cinîyan ê Sîncanî de manena, roja şemeyî seba ke nirxê aye yê gonî kewtî û rewşa aye giran bîya, birîye neweşxane. Ame vatene ke na merhele de enzîmê aye yê cigerî zî zêde bîyê. Newroz Bozkurte, ke 28 serre yo girewte ya, hezîrana 2025î de neweşîya Lenfositik Losemîya Kronîk (KLL) ci de ame teşhîskerdene.
Goreyê agahîyanê ke avûkatan ra amey girewtene, Bozkurte verê ama berdene Neweşxaneya Dewlete ya Sîncanî, dima ra zî sewqê Neweşxaneya Başêr a Etlîkê ya Ankara yî bîya. Newroz Bozkurte neweşxane de yewîna çimdarîya intensîf de tedawî bena û rewşa aye a xeternake dewam kena.
Ame vatene ke avûkatê Bozkurte eşkera kerdo: tevî ke kanûna serra parî de nirxê aye yê gonî kêmî bîyî, dixtoran mudaxele nêkerdo; seba naye înan gereyê dixtoran kerdo.











