Îstanbul – Seba hepsîyo nêweş Tuncer Saglam ke Hepisxaneyê Emnîyetê Berzî yê Wanî de bî û cuya xo vîndî kerd, Esenyurt de şîn ame ronayîş.
Komeleya MEBYA-DER’î seba hepsîyo nêweş Tuncer Saglam ke seba tedawî berdîbi Nêweşxaneya Bajarî ya Etlîkî ya Ankara û 7ê teşrîna peyêne de uca cuya xo vîndî kerdbî, qezaya Esenyurtî ya Îstanbulî de şîn rona. Şîn bînaya Rêxistina DEM Partî ya Esenyurtî de ame ronayîş. Temsîlkarê rêxistinanê komelkîyan û partîyanê sîyasîyan ê şaristanî û zaf welatijî tewrê şînî bîyî.
Salonê şînî de fotografê Tuncer Saglamî, vilikî û rengê kesk, sûr û zerd ameyî dardekerdiş. Sewbîna pankartê bi nuşteyanê “Şehîdê ma şerefê ma yê” û “Şehîdî nêmirenê” ameyî dardekerdiş. Badê hurmetmojnayîşî, sînevîzyonêk derheqê rewşa Tuncer Saglamî û hepsîyanê nêweşan de ame mojnayîş.
Şîn ke keye û merdimê Tuncer Saglamî zî tede ca girewt, do hetanî şanî dewam bikero.











