Federasyonê Elewî Bektaşîyan, serra 89îne ya îdamkerdişê Seyîd Riza û embazanê ey de eşkerayîyêk daye û vat: “Edalet cayê xo nêresayo, heqîqet nêame eşkerakerdene.”
15ê teşrîna peyêne ya 1937î de Seyîd Riza, Ûsifan ra Findiq Ağayê lajê Kamerî, Kureyşan ra Hesenê Îbrahîmê Qicî, Kureyşan ra Usenê Seydî/Seyd Usen, Demenan ra Hesen Ağa/Hesenê Civrail Ağayê Arekêye, Demenan ra Alîyê Mirzê Sili û Resik Usenê Seyd Rizay ameyî idamkerdene. Serê naye ra 89 serrî vîyartî. Handê serrî vîyartî la cayê mezelanê Seyîd Riza û embazanê ey nêame eşkerakerdene; rêçeyê qetlîam, sirgun û remnayîşê bi zorî yê Tertelayê Dêrsimî ya 1937-38î, nesilan ra dewrê nesilan bî û heta roja ewroyêne ame.
Cayê mezelanê Seyîd Riza û embazanê ey hema zî nê komelî ra yenê veşartene
Federasyonê Elewî Bektaşîyan (ABF), serra 89îne ya idamê înan de eşkerayîyêk nuştekîye daye. Eşkerayî de ame vîr ardene ke Dêrsim de îradeyê şarî, bawerî û rûmetê ey pawitox Seyîd Riza û embazê ey, serra Seyîd Rizayî kêmî kerdene û serra lajê ey Resik Huseynî zêde kerdene ra dima, şewa 14ê teşrîna peyêne ra 15ê teşrîna peyêne rê, 1937î de, Xarpêt de Meydanê Genimî de ameyî idamkerdene.
Seyîd Rizayî vat ke “Mi lajê mi ra ver bidarnê, ez idamê lajê xo nêvînî” û ci rê soz ame dayene; labelê lajê ey Huseyn, ey ra ver û ver o çiman de ame idamkerdene. Eşkerayî de ame vatene: “Tevî ke 89 serre vîyartî, Seyîd Riza bi çi ra ame tawanbar kerdene û çi tewir dadkerdişêk ame viraştene eşkera nêbîyo; tîya ra qeydê dadgehî zî, sey ke dewa Qetlîamê Mereşî de, bi “Sirrê Dewlete” vatene ra, raya pêroyî rê nêame eşkerakerdene. Cayê gorê Seyîd Riza û embazanê ey zî hema zî nê komelî ra yenê veşartene.”
Ma Seyîd Riza û embazanê ey rêz ra yad kenê, xoverdayîş, birûmetîya û têkoşîna înan selam kenê
Domnayîşê eşkerayîye de “Edalet cayê xo nêresayo, heqîqet nêame eşkerakerdene” ame vatene û nê çî ameyî nuştene:
“Seyîd Riza û embazê ey, tenya qurbanîyê demêk nê; a ra ver simbolê mazlûman ra hetîbîyayîşî, zulumî ver de sere ronênayîşî û heqîqetî ver de sereberz vindetişî yê. Îdamê înan şarî de travmayêka giran viraşt û hafizaya kulturî û bawerîyî de birînê xorîn akerdî.
Ma, sey Federasyonê Elewî Bektaşîyan, ke nê êşê tarîxî vîr nêbo û heqîqet bi her alîyan ra bêro eşkerakerdene rê, têkoşîna xo bi qerarî dewam kenê. Eşkerakerdişê çîyanê ke 1937-38î de Dêrsim de bîyî, seba xurtbîyayîşê haştîya komelî û vîjdanê hempar ganî yo. Ma do bingeyê hemwelatîbîyayîşê seypê, azadîya bawerî û huqûqê însanî de edalet bixwazê.
Vatişê Seyîd Rizayî ewro zî hafizaya ma de yê: ‘Mi zuran û hîleyanê şima de baş nêkerd, na mi rê bîyê derd. Labelê mi zî şima ver de sere ronêna, na zî şima rê bibo derd.’ Nê vatişî, heqîqetî dima gêrayîşê ma çiqas muhîm û qîmetin o, reyna nîşan dano. Ma Seyîd Riza û embazanê ey rêz ra yad kenê, xoverdayîş, birûmetîya û têkoşînê înan selam kenê.”









