Wan – Cenazeya hepsîyo nêweş Tuncer Saglamî ke nêweşxaneya ke tede tedawî bîyêne de cuya xo vîndî kerdbî, dewa Kolo ya qezaya Qelqelîye de bi girseyî ame definkerdiş.
Hepsîyo nêweş Tuncer Saglam serra 2024î de Wan de bi îdiaya “propagandaya rêxistinî” ameybi destbendkerdiş û Hepisxaneya Emnîyetê Berzî ya Wanî de amenêne tepiştiş. Badê ke halê ey ê weşîye giran bî, 9ê teşrîna verêne de şawîya Hepisxaneya Hûmara 2 ya Sîncanî ya Ankara. Tuncer Saglam ke 25 rojî yo Nêweşxaneya Bajarî ya Etlîkî ya Ankara de tedawî bîyêne û ameybi entubekerdiş, vizêr saetanê sibayî yê verênan de cuya xo vîndî kerde. Cenazeya Tuncer Saglamî vizêr şewe resa Wan û berdîye morgê Goristanê Akkopruyî ya qezaya Tûşba.
Ewro sibayî keyeyê Tuncer Saglamî, temsîlkarê Komeleya TUHAY-DER’î ya Wanî, DBP û DEM Partî û zaf kesê bînî cenaze morg ra girewte û berde dewa ey Kolo ya qezaya Qelqelîye. Cenaze dewa Kolo de bi sloganan û girseyî ame definkerdiş.
