DEM Partiyê bi boneya 7ê Mijdarê Roja Zimanê Lazî daxuyaniyek da û anî ziman ku polîtîkayên asîmîlasyonê çand û zimanên herêmê tune dikin û banga parastin, fêrbûn û bikaranîna zimanê Lazî kir.
7ê Mijdarê wekî “Roja Zimanê Lazî” tê pîrozkirin. DEM Partî bi daxuyaniyeke nivîskî bal kişand ser girîngiya parastina zimanê Lazî û xwest ku zimanên zikmakî di bin misogeriya makeqanûnê de be.
DEM Partiyê di daxuyaniya xwe de destnîşan kir ku Lazî ne tenê amûreke ragihandinê ye, di heman demê de xezîneyeke çandî ya bêhempa ye ku dîroka devkî, bîra kolektîf û xwezaya Deryaya Reş di nava xwe de dihewîne.
Di daxuyaniyê de hat bibîrxistin ku 7ê Mijdarê di dîroka Lazan de xwedî du wateyên pir girîng e: “Yek di 7ê Mijdara 1929an de yekem rojnameya Lazî Mç’ita Murutsxi (Stêrka Sor) dest bi weşanê kiriye. Ya duyemîn rojbûna hunermendê muzîka Lazî Kazim Koyuncu ye.”
‘Asîmîlasyon mirineke çandî ye’
Di daxuyaniyê de hat gotin ku ji ber polîtîkayên yekparêz û înkarker ên bi salan e tên meşandin, gelek zimanên wekî Lazî, Kurdî, Hemşînî, Çerkesî û Sûryanî ji jiyana civakî hatine qutkirin û li qadên perwerde, zanist û hemû qadên civakî hatine astengkirin. Her wiha hat gotin ku kêmxurtbûna zimanê Lazî ku ji aliyê UNESCOyê ve di nava zimanên bin xetereyê de ye cih digire, ji bo hemû mirovahiyê windahiyeke mezin e.
Daxwazên DEM Partiyê
DEM Partiyê diyar kir ku mafê her gelî ye ku bi zimanê xwe yê zikmakî biaxive, bifikire û perwerdehiyê bibîne û daxwazên xwe wiha rêz kirin:
*Lazî û çanda Lazî divê di bin misogeriya makeqanûnê de be.
*Mafê perwerdehiya bi zimanê zikmakî divê bê naskirin.
*Li zanîngehan divê beşên Ziman û Wêjeya Lazî û navendên lêkolînê bên vekirin.
*Astengiyên li pêşiya bikaranîna zimanê Lazî di xizmetên cemawerî, medya û qada çandê de bên rakirin.
Di dawiya daxuyaniyê de banga piştevaniyê li her kesî hat kirin ku ji bo fêrbûn, axaftin û pêşxistina zimanê Lazî têkoşîn û hevkarî bê mezinkirin.
