Baroyê Amedî vatişê Serekê Baroyê Îstanbulî Umît Kocasakalî yê derheqê xebitnayîşê ziwanê Kurdkî de şermezar kerdî û da zanayene ke wezîfeyê huqûqî bêvengkerdişê ziwanan nîyo, pawitişê heq û azadîyan o.
Serekê Baroyê Îstanbulî Umît Kocasakalî çend rojî verê cû derheqê eşkerayîyanê baroyan de ke bi Kurdkî kenê, vatbi: “Baroyî nêeşkenê tirkî ra teber bi ziwanêko bîn eşkerayîyan bidê û vila bikerê.” Baroyê Amedî bi eşkerayîyêka nuştekî nê nêzdîbîyayîşê vera ziwanê Kurdkî şermezar kerd.
Baroyê Amedî eşkerayîya xo de da zanayene ke agahdarkerdişê komelî bi ziwanê ci wezîfeyêko bingeyin ê dezgehan o û eşkerayî de wina ame vatene: “Eşkerayîya baroyêkî ya bi Kurdkî binpaykerdişê maddeyê hîrêyin ê Qanûnê Esasî nîyo. Baroyî wexto ke bi Kurdkî eşkerayîyan danê û komelî bi ziwanê ci agahdar kenê, wezîfeyanê xo yê bingeyinan ra yewe, yanî pawitişê heqanê merdiman, anê ca. Vatişê ke baroyî nêeşkenê bi ziwanê Kurdkî eşkerayî û parekerdişan bikerê, mojneno ke kesê ke hesreta ‘Tirkîyaya verêne’ de yê, cehd kenê ke ziwanê kurdan bi pêroyî qedexe bikerê ke şaranê ronayoxan ê na welatî ra yew ê. Wezîfeyê huqûqî bêvengkerdişê ziwanan nîyo, pawitişê heq û azadîyan o.”
Baroyê Amedî peynîya eşkerayîya xo de vatişê xeletî yê vera ziwanê Kurdkî şermezar kerdî.
