Îrfan Yilmazo ke se ra 96 astengdar o, raporê ATKyî yê “hepisxane de nêeşkeno bimano” zî nêame hesibnayene; Serekîya Heyetê Îdare û Çimdarî ya Hepisxaneyê Marmara yê Numre 2 na reye bi behaneya ke ey “slogan eşto”, talebê caardişê înfazî ame astengkerdene.
Îrfan Yilmaz nêweşê serebral palsî yo, tena nêeşkeno karê xo bikero û ciwîyayîşê xo sandalyeya çerxine de vîyarneno. Verê cû Heyetî bi behaneya ke “nêşîyo koxişo serbest” talebê ey red kerdbî.
Wesîyê Yilmazî Hasan Toganî ANFyî rê qisey kerd û vat: “Ti kotî ra biewnî, no binpaykerdiş o. Îrfan bira rê huqûqê dişmenî ra zêdeyêr huqûqê heyfgirewtişî yeno ramitene.”
Toganî ard ziwan ke awanîya hepisxaneyî seba sandalyeya çerxine minasib nîya û gardîyanî her pêdîyayîşî de Yilmazî kirişenê: “Tuwaletê koxişan alaturka yê, Îrfan bira nêeşkeno uca de karê xo bikero. Coka ganî rojê de 5 reyî bezê ey bêro vurnayene. Her roje koxiş de kesêk mecbûr o ke tena bi miqatkerdişê ey bo.”
Toganî dîyar kerd ke sloganê ke 50 serrî yo yenê eştene, hema tu kesî rê ceza nêdîyo la Îrfan Yilmazî rê tehqîqatê dîsîplînî abîyo: “Koxiş de 12 kesan eynî sloganî eştî; la tena Îrfan bira rê qedexeya pêdîyayîşî ame dayene û bi behaneya ke ey ceza girewta, ame vatene ke ‘halê ey baş nîyo’ û veradayîşê ey 6 aşmî ra zî zêdeyêr ame taloqkerdene.”
Toganî vat ke înan muracatê Baroyê Îstanbulî û TTByî kerdo la hema tu cehdêk nêameyo kerdene.
