Rojnameger Cengîz Altun ke 33 serrî ra ver ameyo kiştene, Êlih de mezelê ey ser o ame yadkerdene. Yadkerdişî de vajîya ke heqîqet û rastî nêkişîyena û qelema şehîdanê Çapemenîya Azade erdî de nêmanena.
Komeleya Rojnamegeranê Dîcle-Firatî (DFG) û Komeleya Rojnamegeranê Cinîyan a Mezopotamya, bi munasebetê serrgêra 33. ya kiştişê rojnameger Cengîz Altunî Goristanê Çamlica yê Êlihî de şîyê mezela ey ser o û ey vîr ard. Endamê DFG, MKG, keyeyê Cengîz Altun, rayberê DEM Partî û DBP’yî yê Êlihî tewrê programê yadkerdişî bîyî.
Fotografê Cengîz Altunî û qerenfilî mezel ser o ronîyayî. Yadkerdiş bi rêzgirewtişê şehîdanê Çapemenîya Azade dest pêkerd.
‘Ewro zî bi SÎHA’yan rojnamegerê kurdî yenê kiştene’
Ewil endamê DFG’yî Bilal Guldemî qisey kerd û va ke Cengîz Altun şehîdanê Çapemenîya Azade ra yew o û ê şexsê Cengîz Altunî de heme şehîdanê Çapemenîya Azade yad kenê. Bîlal Guldem wina dewam kerd: “Serranê 1990î de rojnamegerê kurdî mîyanê kolanan de ameyî kiştene û ewro zî rojnamegerê kurdî Rojawan û Başûrê Kurdîstanî de bi bombebaranê SÎHA’yan yenê kiştene. Ma do tim rêça şehîdanê Çapemenîya Azade de bimanê û do ala têkoşîn û qelema înan erdî de nêverdê.
‘Bi hezaran rojnamegerê kurdî rêça şima de yê’
Dima ra Hemsereka DFG’yî Dîcle Muftoglu qisey kerd û vat ke ewro seba yadkerdişê Cengîz Altunî û heme şehîdanê Çapemenîya Azade ameyê pêser û va: “Cengîz Altun şehîdo verên yê Çapemenîya Azade yo. Bi kiştişê Cengîzî waştêne vengê heqîqeta kurdan zî bikişê. La heqîqeta şarê kurdî hende bihêz bî ke Cengîz Altunan ra dima bi hezaran rojnamegerê kurdî dinya de vejîyayî. Serranê 90î de bi destê Hîzbullah û JITEM’î rojnamegerî ameyêne kiştene, la ewro zî rojnamegerî yenê tepiştiş û Rojawan û Başûr de zî embazê ma yê rojnamegerî bi SÎHA’yan yenê kiştene. Zîhnîyetê serranê 90î hema zî kar de yo û ewro zî rojnamegeran kişeno. La hêz û qewetê Cengîz Altunan ewro hîna zaf o û ma ewro bi hezaran rojnamegerê kurdî vengê şarê kurdî resnenê heme cayê dinya. Qelema şehîdanê ma erdî de nêmende û na heqîqet û no têkoşîn qet nêşikîyeno. Ma tîya ra vengdanê û vanê; heqîqet nêkişîyena û Çapemenîya Azade bêveng nêmanena.”
‘Zaliman nêwaşt vengê kurdan bêro eşnawitene’
Hemserekê DEM Partî yê Êlihî Mustafa Tekîkî zî qisey kerd û dîyar kerd ke ê zî bi nameyê DEM Partî heme şehîdanê Çapemenîya Azade bi hurmet û heskerdiş yad kenê. Mustafa Tekîkî ard ziwan ke se serrî yo ke şarê kurd û Kurdistanê pîrozî ser o qirkerdiş dewam keno û va: “Vera nê qirkerdişan se serrî yo ke têkoşîn û xoverdayîşê heqîqete ya şarê kurdî dewam kena. Heme zalimî û desthilatdarî nêwazenê ke vengê şarê kurdî bêro eşnawitene. Cengîz Altun û embazê xo waştêne bi rojnamegerîye veng û waştişê şarê kurdan dinya de vila bikê. La zaliman û desthilatdaran nêwaşt ke kurdî bibê wayîrê heq û statuyî û waşt ke kurdan qir bikê. La Cengîz Altun û embazê xo nêverdayî ke şarê kurd bêziwan û bêxeber bimano. Ma do hertim şehîdanê heqîqeta Kurdîstanî yad bikê. Ma do hertim têkoşînê şehîdanê xo berz bikê.”
‘Do zilm sernêkewo’
Dima ra dayîka Cengîz Altunî, Turkan Altunî qisey kerd û seba Çapemenîya Azade û şarê kurdî serweşîye waşt. Turkan Altunî ard ziwan ke dewlete zulmêko pêt şarê kurdî ser o kerdo û va ke no zilmê dewlete do nêreso amancê xo.
‘Ma sozê şima anê ca’
Birayê Cengîz Altunî, Azad Altunî zî qisey kerd û va ke o bi nameyê keyeyê xo xêrameyîşê heme mêmanan keno. Azad Altunî dîyar kerd ke înan 33 serrî verê cû rojêka sey ewroyî nê mezelî ser o soz dabi Cengîzî û wina va: “Ewro ma ê sozê xo anê ca. Ma vatbi do qelema to erdî de nêmana û nêşikîya. Belkî a roje yew kes ame kiştene û waşt ke ê ruhê resnayîşê azade bibirnê, la ewro ma bi hezaran rojnamegerê kurd ê û lingan ser o yê û heme dinya de vila bîyê. Ewro bi saye rojnamegeranê kurdan ke rêça Cengîz Altun, Hafiz, Orhan û Apê Musayan de rojnamegerî kenê, vengê kurdan heme dinya de vila beno. Zîhnîyetê serranê 90î ewro zî kar de yo. Her roje ke hişmendîya azadbîyayîşî hîna zaf vila bena û berz bena. Ma bi saye şehîdanê xo resayî nê rojan. Ma reyna heme şehîdanê xo bi hurmet yad kenê û vanê do qelema şima erdî de nêmana û do huyayîşê şima nêçilmisîyo.”
Badê qiseykerdişan programê vîrardişî qedîya.
