Parlamentera DEM Partî Newroz Uysal Aslane Hepisxaneyê Tîpê F yê Bolu de girewteyî zîyaret kerdî. Newroz Uysal Aslane dîyar kerd ke hepisxane de kurdkî yena astengkerdiş û tedayê girewteyan ser o zêde bîyê.
Parlamenteranê DEM Partî Newroz Uysal Aslane û Yilmaz Hunî û endamanê Komeleya Huqûqnasan seba Azadîye (ÖHD) vizêrî Hepisxaneyê Tîpê F yê Bolu de girewteyan reyde pêvînayîş kerd. Badê pêvînayîşî verê berê hepisxaneyî de eşkerayîyêk daye.
Newroz Uysal Aslane dîyar kerd ke badê vurîyayîşê mudirê hepisxaneyî teda zêde bîya û wina vat: “Mudiro newe name, rojname û kovarê kurdkî qedexe kerd. Odayanê girewteyan de sereştiş kerdo û cayê înan vurnayo. Mudiro newe ameyo girewteyan rê vano ‘Ez prosesî nas nêkena.’ No mudiro newe kam o, hêzê xo koti ra gêno?”
Newroz Uysal Aslane îfade kerd ke seba çareserkerdişê problemanê hepisxaneyî waştêne berpirsîyaranê hepisxaneyî reyde pêvînayîş bikerê la berpirsîyaran cewab nêdayo: “Ma waşt berpirsîyaran reyde pêvînayîş bikerê la înan vat ‘karê ma est o’ û pêvînayîşî ra remayî. Dima zî cewab nêda ma. Seba ke bêqanûnîya tîya binimnê, nêwazenê pêvînayîş bikerê. La ma vera nê tatbîqatanê înan bêveng nêmanenê.”
Newroz Uysal Aslane peynî de vat ke do her ca de seba heq û azadîya girewteyan têkoşînê xo dewam bikerê.
