Kursê kirmanckî ke hîrê serrî yo Komela Kultur û Piştîpêdayîşî ya Dêrsimî ya Îzmîrî de dewam keno, emser zî seba resnayîşê ziwanî yê neslanê ameyoxan xebatanê xo dewam keno. Hemserekê komele Hasan Alî Kiliçî bale ante muhîmîya ziwanê dayîke ser o û waşt ke perwerde bi ziwanê dayîke bibo.
Komela Kultur û Piştîpêdayîşî ya Dêrsimî ya Îzmîrî hîrê serrî yo binê banê xo de kursê kirmanckî organîze kena ke 40 serrî yo Îzmîr de xebatanê kulturî û piştîpêdayîşî ramena. Amancê kursî o yo ke ziwanê dayîke gandar bimano û bireso neslanê ameyoxan.
Demê qeydkerdişî de 40-50 kesî muracat kenê la sebebê giranîya xebate û şertanê cuya rojane ra her hewte 10-15 kesî beşdarê kursî benê. Beşdaranê kursî ra zafînan de vîrêkê ziwanî hema est o. La ziwano ke keye de nêyeno qiseykerdene û perwerde û waranê pêroyî de ca nêgêno, wextî mîyan de cuya rojane ra teber maneno.
‘Herkes eşkeno beşdar bibo’
Hasan Alî Kiliç ke mamostayîya kursî zî keno, nirxnayîşê xo ma rê ardî ziwan. Kiliçî vat ke ziwanê înan nê serranê peyênan de ê ziwanan ra yew o ke vera vindîbîyayîşî yo. Kiliçî îfade kerd ke herinda ke vajê “eyway, ziwanê ma beno vindî” ê xebitîyenê ke ziwanî gandar verdê û biresnê neslanê ameyoxan. Goreyê Kiliçî kursî bêpere yê û herkeso ke ziwanî rê muhîmî dano, eşkeno beşdar bibo.
‘Eke ziwan bimiro kultur û tarix zî mirenê’
Kiliçî derheqê muhîmîya ziwanî de wina vat: “Ma ziwanî tena sey ziwanî nêvînenê. Ziwan şarêk o. Eke ziwan bimiro şar zî mireno; kultur û tarîx zî mirenê, vîrê ma yo tarîxî zî mireno. Coka ganî ziwan gandar bimano.”
‘Ma ziwanê dayîke de perwerde wazenîme’
Kiliçî bale ante na raştîye ser o ke ganî xebata ziwanî tena bi îmkananê komelan û zerrîwazan sînordar nêmana û vat: “Seba pawitiş û averberdişê ziwanê dayîke ganî warê perwerdeyî de gamê şênberî bêrê eştene û rayîrê perwerdeyê domananê ma bi ziwanê dayîke bêro akerdene. Ma hemwelatîyê nê welatî yê; coka waştişê ma hemwelatîya seypê ya. Ganî hemwelatîyê ke kirmanckî qisey kenê zî sey hemwelatîyanê ke tirkî qisey kenê wayîrê eynî heqan bibê. Waştişê ma yê perwerdeyê bi ziwanê dayîke zî parçeyêkê nê seypêyî yo.”
