Goreyê datayanê TUÎK’î serra 2025î de 51 hezar û 818 kesan Wan ra koç kerdo. Kurdîstan de şarê Wanî tewr zaf bajarê xo ra koç keno û ver bi metropolan şino.
Goreyê datayanê Dezgehê Îstatîstîkî yê Tirkîya (TUÎK), Wan badê Îstanbulî bajaro dîyin o ke tewr zaf koç dano teber. Serra 2025î de 31 hezar kesî ameyî Wan, la 51 hezar û 818 kesan Wan ra koç kerd. Nifûsê Wanî her ke şino kêmî beno û wanijî tewr zaf şinê Îstanbul.
‘Rewşa koçberîya qezayanê Wanî’
Goreyê datayan qezaya ke tewr zaf koç gêna, Rêya Armûşê ya merkezî ya. Rêya Armûşê hem tewr zaf koç dana teber hem zî tewr zaf koç gêna. Badê Rêya Armûşê qezayê Erdîş û Tûşba ca gênê. Qezayê çolî zî nifûsê xo yo kêm reyde zî koç danê; bi rêze Elbax, Qelqelî û Ebex. Nifûsê qezaya Şaxî zî ke tewr kêm o, her ke şino kêmî beno.
‘Sebebê koçberîya Wanî’
Sebebo bingeyin ê koçî bêkarî yo. Wan de rîyê qelsîya sanayî û çinbîyayîşê warê karî ra hemwelatî, bitaybetî ciwanî, ver bi metropolan şinê. Giranbîyayîşê cuye, xercê citkarîye û heywandarîye û îmkanê bajaranê girdan ê sey weşîye û perwerdeyî zî dewan û qezayan veng kenê.
‘Tesîrê bêkarî û krîzê ekonomîkî’
Hemwelatîyê Wanî sektoranê xizmetî de kar nêvînenê; êyê ke xebitîyenê zî zafane binê meaşê tewr kêmî de xebitîyenê. Tirkîya de meaşê tewr kêmî 28 hezar û 75 TL yo, sînorê vêşanîye 37 hezar û 801 TL yo. Goreyê datayan xercê aşmane yê ciwanêkê xebatkarî 48 hezar û 885 TL yo. Zaf ciwanê wanijî seba karanê demsalî yê sey înşaat û citkarîye Wan ra vejîyenê; no sey koçberîye nêyeno hesabkerdene la badê demêk zafê înan reyna nêagêrenê bajarê xo.
‘Kêmbîyayîşê citkarîye û heywandarîye’
Dewan de ekonomîya citkarîye û heywandarîye rîyê giranbîyayîşê xercan ra kêmî û bêqîymet bena. Dewijî êdî nêşênê bi citkarîye û heywandarîye debara xo bikerê coka ver bi merkezê Wanî û metropolanê Tirkîya şinê. Propagandaya bajarîyîye ya ke medyaya dîjîtale de yena kerdene zî dewijan ver bi metropolan bena.
