AMED – Endama Komela Cinîyan a Rosa Esra Çîçeke derheqê qetlê cinîyan de qisey kerd û vat: “Qetlê cinîyan polîtîk o û ma nê polîtîkayan qebul nêkenê.”
Tirkîya de roje çin a ke cinîyî tede nêrê qetlkerdene. Her roje cinîyî bi destê camêrdan yenê qetlkerdene. Kesê ke cinîyan qetl kenê, hetê dewlete ra nêyenê cezakerdene. Serra 2025î de Tirkîya de 294 cinîyî ameyî qetlkerdene. Goreyê agahîyanê çapemenîye destpêkê serra 2026î ra heta ewro zî 189 cinîyî ameyî qetlkerdene. Ma derheqê na babete de Endama Komela Cinîyan a Rosa Esra Çîçeke reyde qisey kerd.
‘Camêrdî wazenê ke cinîyî bibê kole’
Esra Çîçeke bale ante qetlê cinîyan ê Tirkîya ser o û vat: “Tirkîya de roje çin a ke cinîyî tede nêrê qetlkerdene. Her roje cinîyî yenê qetlkerdene; tayê rojan de panc-şeş, şeş-hewt cinîyî bi destê camêrdan yenê qetlkerdene. Wexto ke camêrdî cinîyan qetl kenê ma şinê uca û ewnîyenê ke sebeb çi yo. Ma cigêrayîş kenê û vînenê ke mîyanê keyeyî de cinîyî wazenê seba xoserîya xo camêrdî ca verda yan zî xoser biciwîya. Cinîyî wazenê mîyanê keyeyî de derheqê cuya xo de qerar bidê la camêrdî naye qebul nêkenê. Camêrdî vanê: ‘Cinî ganî kole bo, ganî xizmetkar bo; ez vaja se, ganî qiseya mi ra teber çîyêk nêkero. Cuya cinî ganî seke ez wazena, wina bo.’ Wexto ke cinîyî naye qebul nêkenê, zordarî û şîdet dest pêkenê. Şîdet cinîyan ser o beno çike faşîzm û dewlete cinîyan sebebê nê şîdetî vînenê.”
‘Polîtîkaya bêcezayîye qatlkaran rê cesaret dana’
Esra Çîçeke vat ke cinî hema zî verê çimanê şarî de yenê qetlkerdene û wina dewam kerd: “Qatîlê cinîyan bêceza manenê yan zî yenê tepiştene û reyna yenê verdayene. Qatilkarî cesaret û piştî nê polîtîkaya dewlete ra gênê. Ma vînenê ke ‘polîtîkaya bêcezayîye’ û polîtîkaya dewlete eynî yê. Ma operasyonanê dewlete yê seba ‘pawitişê keyeyî’ û projeyanê ‘10 serrê keyeyî’ vînenê. Polîtîkaya dewlete na ya ke cinî ganî destê yewna kesî de bê. La cinîyî naye qebul nêkenê. Ganî dewlete ê camêrdan rê ke cinîyan qetl kenê, cezaya girane bido. Ganî ‘polîtîkaya bêcezayîye’ bêra hewanayene û cezayê giranî bêrê dayene. O wext no zanayîş mîyanê komelî de zî vila beno.”
‘Ma nê polîtîkayanê qilêrinan qebul nêkenê’
Esra Çîçeke derheqê Komela Rosa de zî qisey kerd û venga cinîyan da: “Ma sey dezgehê Rosa xebatanê hişyarî û famkerdişî kenê. Ma wazenê ke cinî û heme komel hişyar bibê. Verê çimanê ma de, kuçe û parkan de merdimî vînenê ke camêrdî cinîyan qetl kenê yan zî hêriş kenê. Ma nê çîyan qebul nêkenê. Şîdet û qetlê cinîyan polîtîk ê. Ma nê polîtîkayanê qilêrinan qebul nêkenê. Seba naye ma kuçe û parkan ra her roje veng danê û piştî danê cinîyan.”
