Rayberê DBP’yî yê Wanî Mehmet Saît Karabiyikî bale ante muhîmîya yewîya kurdan ser o û vat: “Vera polîtîkayanê dewletanê mîyanneteweyîyan yewî zaf muhîm a ke îtîfaqê ma bêro dîyene; xelasî û azadîya şarê kurdan yewîya neteweyî de ya.”
Enstîtuyê Cigêrayîşan ê Rojhelatê Mîyanênî (MERI) Hewlêr de di rojan forumêk organîze kerd. Hemserekê Pêroyî yê DEM Partî Tuncer Bakirhan, Endama Parlamentoyê Sûrîye Îlham Ehmed, Şêwirmendê Serkomarîya Sûrîye Mazlûm Ebdî, Serekê Herêma Kurdîstanî Neçîrvan Barzanî, Serekê Pêroyî yê YNK’yî Bafil Talabanî û Hetkarê Serekwezîrê Herêma Kurdîstanî Qûbad Talabanî ke beşdarê forumî bîyî, bi fotografanê xo yê pêro şarê kurdan keyfweş kerd û babeta yewîya neteweyî reyna arde rojeve.
‘Kurdî parçebîyayeyî nîyê, hêzêko yewbîyaye yê’
Karabiyikî ard ziwan ke kurdî bi seyan serran o hesreta yewîye ancenê û rîyê bêîtîfaqîye ra her çar parçeyê Kurdîstanî bi serran o yenê talankerdene: “Pêşengê şarê kurdan bi serran o dewaya yewîya kurdan kenê; verê her çî Birêz Abdullah Ocalanî serranê verênan de serekanê Kurdîstanî rê mektubî şawitî. Çi heyf ke rîyê sebebanê cîya-cîyayan ra yewîye awan nêbîye. Êdî şarê kurdan ser o ferz o ke bêro têhet û yewîya xo awan bikero. Ganî ma bimojnê ke ma hêzêko parçebîyaye nîyê; ma her çar parçeyanê Kurdîstanî de hêzêko yewbîyaye yê.”
‘60 mîlyon kurdî yew veng û yew reng ê’
Karabiyikî derheqê fotografanê rayberanê kurdan de keyfweşîya xo ard ziwan û wina dewam kerd: “Wexto ke merdim ê fotografan vîneno ke rayberê kurdan ameyê têhet û qisey kenê zerrîya her kurdî germ bena. Na a mana de ya ke êdî ma nakokîyê mabênê xo verdayê. Ma do yewîya xo awan bikerê û vera hêzanê mîyanneteweyîyan tepşêko hempar bimojnê. 60 mîlyon kurdî yew veng û yew reng ê.”
Karabiyikî îfade kerd ke no tepş do hem Tirkîya de hem zî Rojhelatê Kurdîstanî de tesîrêko pozîtîf bikero û Îran zî do bivîno ke kurdî êdî kurdê verênî nîyê.
‘Eke yewîya ma bibo hewcedarîye bi hêzanê teberî nêmanena’
Karabiyikî qiseykerdişê xo wina qedêna: “Başûr û Rojawanê Kurdîstanî de ma verê piştîya xo dayêne hêzanê mîyanneteweyîyan la no seba ma qelsîyêk bî. Badê ke yewîya ma bibo hewcedarîye bi hêzanê mîyanneteweyîyan nêmanena. Ma sey DBP û partîyêka Kurdîstanî eşkenê pêşengîya yewîye bikerê. Awankerdoxê yewîya şarê kurdan Birêz Abdullah Ocalan o.”
