Endama heyetê îdarekarî ya Komela Cinîyan a Rosa Esra Çîçek Mercan qisey kerd û va: “Hemverê Serra Keyeyî ke daya vernîya ma, polîtîkayê de ke derheqê welidnayîşê cinî de qerar danê, ma do qerarê çalakîyan bigîrê.”
Tirkîya û Kurdîstan de şîdetê cinîyan ser o ke her ke şino zêde beno û qanûnî bêtesîr manenê. Komela Cinîyan a Rosa ya 2018î ke heta nika hemverê şîdetê cinîyan ser o têkoşîn kena, rojev û xebatê xo ajansê JINNEWS’î reyde pare kerdî.
‘Problem canêardişê qanûnan o’
Esra Çîçek Mercan wina qisey kerd: “Netîceya têkoşînî de Peymana Stenbolî ame hazirkerdiş. Qanûnê 6284. kewt merîyet. Seba ke tayêd madeyê Qanûnê Cezaya Tirkan û Qanûnê Medenî ya Tirkan de bêro vurnayîş, têkoşîn ame dayîş. Hem têgêrayîşê cinîyanê tirkan, hem têgêrayîşê cinîyanê kurdan de no têkoşîn bi. Badê nê têkoşînî qanûnan de vurnayîş ame kerdiş. La ma sibayêk wariştê ke Peymana Stenbolî ameya betalkerdiş. Hukmê serdest ê camêrdan xeylê qanûnî çin hesibnayî. Bi bahaneyê rewşa başî, tahrîkê bêheq qanûnî pê nînê. Problem o yo ke qanûnê bi tesîrî nêyenê ca. Seba ke qanûnê bîyayî bêrê ca, ma têkoşîn danê.”
‘Cinî eşkena derheqê xo de qerar bida’
Esra Çîçek Mercan îlankerdişê ‘serra keyeyî’ ser o qisey kerd û va: “Keye, rolî ke dewleta camêrdî cinîyan ser o ferz kerdo, înan ra yew o. Keye mekanîzmayêko ke cinîyan ser o qerarê sey hepsê keyeyî keno, çend gedeyan anê dinya, senî zewicêna û senî ciwîyena, çîyêko winasîn o. Senî eşkenê cinîyan ser o qerar bidê. Nêweşxaneyê dewlete de cinî nêeşkenê kurtaj bibê. Nika rojeve de welidnayîşê sezeryanî est o. Nika prosesêk est o ke wazenê cinîyan ver bi welidnayîşê vajînalî berê. Sey têgêrayîşê cinîyanê kurdî û pêro cinîyanê Tirkîya ma do hemverê nê qerarê cinîyan ser o têkoşîn bikerê.”
Esra Çîçek Mercan qiseykerdişê xo qedêna: “Prosesê qeyûman ê 8 serran texrîbatêko pîl cinîyan ser o viraşt. Ma cinîyan reyde têkoşîn danê. Ma atolyeyan de yenê têhet û hişmendî awan kenê. Ma do hemverê polîtîkayanê ke cinîyan ser o yê, qerarê çalakîyan bigîrê.”
