Goreyê doneyanê Şaredarîya Îstanbulî ya Şaristanê Girdî (ÎBB) Îstanbul de metrekareyêk de 242 kîloyî varan varayo. No varan 1985 ra nat varano tewr zêde yo. 2 kesî cuya xo ra bîyî, bi hezaran awanîyî binê awe de mendî.
Îstanbul de vizêr ra nat varan bêvindertiş dewam keno. Hema-hema heme şaristan binê awe de mend çunke şaristanî de keskîye zaf kêmî ya û binawanîya ci zeîf a.
Parka Çukurbostanî de ke Taxa Balatî ya qezaya Fatîhî de ya, gedeyêko 14 serre cuya xo ra bî. Gede kewt çalêka pirr awe û elektrîkî ci girewt. Taxa Ayazaga ya qezaya Sariyerî de zî merdimêk kewt awa laserî û xenekîya.
Laserî ra pey rayîrî xerepîyayî, trafîk vindert û zaf hemwelatî heta nêmeyê şewe teber ra mendî. Walîtîya Îstanbulî dîyar kerd ke heme Îstanbul de dersî ameyî betalkerdene û xebitnayîşê motorsîkletan ameyo qedexekerdene. Walîtîye venga hemwelatîyan da ke eke mecbur nêbê keyeyanê xo ra nêvejîyê.
Goreyê Merkezê Koordînasyonê Afetan (AKOM) ewro zî Îstanbul de varan do bêvindertiş dewam bikero. AKOM’î seba meşte zî hişyarî daye.
