Malbat û dostên Apê Mûsa yê Çapemeniya Azad li Îzmîrê ji bo Apê Mûsa panel û bernameya bîranînê li dar xistin.
Ji bo Apê Mûsa (Mûsa Anter) yê ku di 20ê Îlona 1992an de li Amedê hate kuştin, ji aliyê malbat û dostên wî ve bi dirûşma “Di ronahiya Mûsa Anter de azadiya çapemeniyê” li Sehneya Defxanê ya li Konakê panel û bîranîn hate lidarxistin. Di panelê de Hevşaredarê berê yê Bajarê Mezin ê Amedê Selçûk Mizrakli, Hevberdevka HDKê Meral Daniş Beştaş, parêzer Eren Keskîn, keça Apê Musa Rahşan Anter, kurê wî Dîcle Anter, civaknas Ferhat Kentel û nivîskar Mazlûm Vesek axivîn.
Selçûk Mizrakli beriya panelê axivî û diyar kir ku Apê Mûsa ne tenê hilgirê hafizeyê ye û got: “Dema ku ez Apê Mûsa bi bîr tînim, ez xwe di servîsa lezgîn a Zanîngeha Dîcleyê de dibînim. Ez wekî alîkarê sereke di servîsa lezgîn de dixebitîm. Hevalekî min ê parêzer geriya û got, ‘Apê Mûsa kuştine.’ Ez li wir matmayî mam. Wê gavê ji bilî bijîşkiyê, ew aliyê min ê şoreşgerî mirina Apê Mûsa qebûl nekir. Min ew di dilê xwe de veşart, di hişê xwe de, di ramanên xwe de û di sekna xwe ez her tim bi wî re jiyam.”
‘Pênûsa Apê Mûsa li erdê nemaye û namîne’
Piştre Meral Daniş Beştaş axivî û diyar kir ku Apê Mûsa apê her kesî ye û got: “Ji ber ku wî rastiya me hemûyan qîriya. Ew parêzvanê ziman, çand û nasnameya me bû. Em çiqas wî bi bîr bînin jî, em nikarin bi qasî ku pêwîst e rast bînin ziman. Îro tevî ku çapemeniya azad ewqas tê astengkirin jî, bi biryardarî têkoşîna xwe didomîne û ev jî tê wê wateyê ku pênûsa Apê Mûsa li erdê nemaye û namîne.”
Kurê Apê Musa, Dîcle Anter anî ziman sekna Apê Mûsa hê jî ji bo gelek kesan rênîşandar e û got: “Bi salan pir hewldan ku pênûsa wî bişikînin. Mûsa Beg bi giştî nêzî 11 sal û nîvan di surgunê de derbas kir. Bêguman di vê navberê de malbata me parçebû. Birayê min çû Swêdê, xwişka min zewicî, ez çûm Swêdê. Piştre gotin ‘Me çi bi Kurdan kiriye?’. Ma hûn ê hîn çi bikin? We Kurd hemû malbat mecbûrî koçberiyê kirin, malbat parçe kirin, ji vê mezintir dram heye?”
‘Wî êşa hemû rojnamevanên Kurd dikişand’
Eren Keskîn jî bîranînên ku bi Apê Mûsa re derbas kiribûn parve kir û got: “Mehmet Alî Bîrand di quncikekî Rojnameya Mîllîyetê de li ser Kurdan nivîsandibû wê demê her kesî li hev digeriya û şabûneke mezin digotin Mehmet Alî Bîrand behsa Kurdan kiriye. Apê Mûsa di serdemeke wiha de di Rojnameya Ozgur Gundemê de qala çand, ziman û nasnameya Kurdan dikir.”
‘Tevî hemû êşan jî em mîna bavê xwe dikenin’
Keça wî Rahşan Anter diyar kir ku tevî hemû êşan jî ew dikarin mîna Apê Mûsa bikenin û got: “Wekî birayê min jî gotî me bavê xwe nedît. Ji ber ku gef li bavê min dixwarin digotin hay ji zimanê xwe hebe ji ber ku zarokên te hene. Pêşî birayê min, paşê Dîcle, paşê diya min em yek bi yek derketin derveyî welêt. Me gelek zehmetî dîtin lê tevî van êşan jî em hîn mîna bavê xwe dikenin.”
Piştî axaftinan, panel bi pirs, bersiv û îmzekirina pirtûkên Apê Mûsa re bi dawî bû.
