Fuarê Kitaban ê Amedî de panelêk bi sernameyê “Vengê Azadîye, Sembolê Birayîye, Aram Tîgran” ame viraştiş. Qiseykerdoxî cuyayîşê Aram Tîgran ser o vindertê û da zanayîş ke her deyîra ey hîkayeyêk û vengê komelî bi û o radyoya Erîwanî de bîyo stûnêko xurt ê hunerî û Kurdîstan de vila bîyo.
Fuarê Kitaban ê 10. yê Amedî ke hetê DTSO û TUYAP’î ra yena viraştiş, roja 7. de dewam keno. Fuarî de bi hemkarîya DTSO û Ma Musicî, panelê “Vengê Azadîye, Sembolê Birayîye, Aram Tîgran” ame viraştiş. Koordînatorê Ma Musicî Şêrko Kaniwarî moderatorîyê panelî kerd û hunermend Dilovan, Delîl Dîlanar, Neşet Guçmen û nuştox Kakşar Oremarî, sey qiseykerdoxî cuyayîşê Aram Tîgran ser o qisey kerd.
‘Her deyîra ey hîkayeyêk û vengê komelî bi’
Kakşar Oremarî va ke Aram Tîgran armenî bi la seba ziwanê kurdkî xebitiya û deyîrê ey hîkayeyê çîyanê ke komel cuyayo bi. Ê va: “Mamoste Aram bêmerg o, ma bi hurmet ey bîr anê.”
‘Aram Tîgran mabenê merdiman de pirdêk bi’
Delîl Dîlanarî dîyar kerd ke mîsyonêko taybet Aram Tîgranî girewtibi xo ser û o mabenê merdiman de bîyo sey pirdêk.
‘O stûnê hunerî bi’
Hunermend Dilovanî va ke birayê Aramî pêro sazkar bî û o bi saya Radyoyê Erîwanî ame nasnayîş, deyîrê ey deyîrê kurdewarî bî.
‘O bi veng û cumbuşê xo deyîrê xo resnayê şarî’
Muzîkjen Neşet Guçmenî va ke Aram Tîgranî hetê ziwan û muzîgî ra mabenê şaran de pirdêk awan kerd.
Badê panelî, tewrbîyayox û mêmananî bi veng û cumbuşê deyîrê Aram Tîgranî vatî û panel qedîya.
