Hemşaredarê Şaredarîya Amedî ya Şaristanê Girdî Serra Bucak û Dogan Hatun, beşdarê beyanatê çapemenîye û rayîrşîyayîşî bîyî ke derheqê eştişê qeyyumî yê şaredarîyan de Enqera de ame kerdene.
Hemşaredare Bucak waşt ke vengê şarî bêro eşnawitene û pêşnîyazo ke seba wedarnayîşê qanûnê qeyumî dîyayo meclîs de bêro tetbîqkerdene.
DEM Partî, derheqê eştişê qeyyumî yê şaredarîyan de Parka Guvenî ya Enqera de beyanatê çapemenîye organîze kerd. Beyanatê çapemenîye de, Hemşaredarê Şaredarîya Amedî ya Şaristanê Girdî Serra Bucak û Dogan Hatun reyde Hemserekê Pêroyî yê DEM Partî Tulay Hatîmogullarî û Tuncer Bakirhan, hemşaredarî û endamê meclîsî beşdar bîyî.
Beyanatî de Hemserekê Pêroyî yê DEM Partî Hatîmogullarî û Bakirhanî qisey kerd û waşt ke polîtîkayanê qeyumî ra dest bêro eştene.
Dima ke beyanat ame dayene Hemşaredarî Bucak û Hatun, kesê ke tewrê înan bîyî, pîya Parka Guvenî ra heta berê Dîkmenî yê Meclîsî şîyî.
Hemşaredare Bucak: Vengê şarî goşdarî bikerê
Hemşaredare Serra Bucak Berê Dîkmenî yê Meclîsî ver de qisey kerd û dîyar kerd ke nê rojan de rolêko pîl keweno Wezîrê Karanê Zereyî, Wezîrê Edaletî û heme Meclîsî ser o û va: “No rayîro ke şino aştî, azadî û demokratîkbîyayîşî de, vengê şarî , vengê herêman goşdarî bikerê. Ca de pêşnîyazo ke seba wedarnayîşê qanûnê qeyumî ameyo dayene Meclîsê Miletî de bidê tetbîqkerdene. Seba ke şima bibê hêvîya aştî, azadî û komelê demokratîkî yo bihêvî, cewab bidê şaran.”
