Konseya Rayberan a KNK’yî, yewkerdena hêzanê pêşmergeyî pîroz kerd û sey ‘gamêka tarîxî’ erjna. KNK’yî bale ante krîzê sîyasî yê Başûr ser o û vengdayîş kerd ke hukmato newe bêereykewtişî bi hawayêko lezabez bêro awankerdene.
Konseya Rayberî ya Kongreya Neteweyî ya Kurdîstanî (KNK), derheqê yewkerdena hêzanê pêşmergeyî de eşkerayîyêk vila kerd.
KNK’yî nê gamî seba Başûr û pêroyî Kurdîstanî pîroz û pozîtîf erjna û vengdayîş kerd ke hukmato newe yê herêmê Kurdîstanî bi hawayêko lezabez bêro awankerdene û wina va: “Vizêrî şaristanê Hewlêr de, seba yewkerdena hêzanê pêşmergeyî, bi amadebîyayîşê Serekê Herêma Kurdîstanî Nêçîrvan Barzanî, Serekwezîr Mesrûr Barzanî, Cagirê Serekwezîrî Qubad Talebanî, Wezîrê Pêşmergeyan Şoriş Îsmaîl û xeylî rayberê herême, merasîmêk ame viraştene. Merasîmî de ame eşkerakerdene ke bi des hezar pêşmergeyê yewîneyanê 70 û 80î kewenê mîyanê çarçewayêka yewgirewte yê leşkerî û welatî û do endî raşteraşt binê fermandarîya Wezaretê Pêşmergeyan de bibê.”
KNK’yî eşkerayîya xo de bale ante waştişo tarîxî yê şarî ser û wina domna: “Yewkerdena hêzanê pêşmergeyan bi desan serran o ke waştiş û îradeyê heme şarê Kurdîstanî bî. No gam vera heme xêrnêwazanê Kurdîstanî mesajêko neteweyî û welatî yo û beno bingeya xurtkerdena hêvîya yewrêzîye ya zereyê keyeyê kurdan.”
KNK’yî hêvîya xo dîyar kerd ke no gam bibo destpêkê yewkerdena heme sazgehanê îdarî, emnîyet, aborî û dîplomatîk ê herêma Kurdîstanî û seraserê Kurdîstanî de zî bibo wesîleyê yewîyî û yewrêzîya neteweyî.
Seba awankerdena hukmatî vengdayîş ame kerdene
Eşkerayîye de KNK’yî bale ante derbazbîyayîşê wextî yê badê weçînayîşî û wina qiseykerd: “Nêzdî di serrî yo ke weçînayîşê Parlamentoya Herêma Kurdîstanî ameyo viraştene, la heta nika parlamento nêxebitîyaya û hukmato newe ware nêamo. Na rewşêka tehluke ya û nêyena qebulkerdene. Ma hêvî kenê ke wextêko kilm de parlamento kom bibo û hukmato newe bêro awankerdene.”
Peynîya eşkerayîye de KNK’yî nê gamî şarê Başûrê Kurdîstanî û heme kurdanê dinya rê pîroz kerd û seba piştîdayîş û qerardarîya înan, spasîya PDK, YNK, heme partî, rêxistin û şexsîyetanê ke kede înan nê yewkerdene de est a, kerd.
