Welatîyanê Amedî derheqê serkewtişê Amedsporî de şayîya xo ard ziwan û mesajê piştîdayîşê taximê xo da.
20ê êlule de hewteyê 6. yê Lîgê Superî de Amedspor û Beşîktaş Stadyumê Tahîr Elçî yê Amedî de ameybî têver. Amedsporî Beşîktaş 3-2 bin vist û kewt rêza verêne ya Lîgê Superî. Badê maçî hetgirê Amedsporî zaf cayan de vejîyayî meydanan û serkewtiş pîroz kerd.
Welatîyan şayî û heyecanê xo ard ziwan û bale ante binpaykerdişê heqanê Amedsporî ser o. Welatîyan vat ke kes nêeşkeno vera Amedsporî vejîyo: “Hakemî maç bi hîleyan 14 deqîqeyî derg kerd. Waşt ke Beşîktaş bikewo ser, la Amedsporî firset nêda înan. Ma bi xêrê Gift Orban û Dîa Saba vernîya kayanê înan girewt.”
“Ma wazenê Amedsporî Ewropa de zî bivînê”
Welatîyan dîyar kerd ke Amedspor seba înan tena sembolêk û taximêkê futbolî nîyo; eynî wext de nasnameyê neteweyê kurdî û cografyaya Kurdîstanî yo: “Ma bawer kenê ke Amedspor do Ewropa de zî kay bikero; ma do ey Lîgê Şampîyonan yan UEFA de bivînê. Amedspor seba şarê kurdî yewîye, haştî, wayûbirayîye û seypêyî yo. Amedspor tena seba Amedî nîyo, seba çar parçeyanê welatî yo. Amedspor seba ma nasname, estbîyayîş û sereberzî yo.”
