Şaristanê Kohatî yê eyaletê Hayber Paxtunxwa yê Pakistanî de, hêrişêko bi bombayan ke vera camîya merkezê polîsan ame kerdene û dima pêkewtişî de tewr kêmî 31 kesî ameyî kiştene û bi desan kesî zî birîndar bîyî.
Şaristanê Kohatî yê eyaletê Hayber Paxtunxwa yê Pakîstanî yo ke nizdê sînorê Efxanîstanî yo de, yew camîya merkezê polîsan de hêrişêko bi bombeyan ame kerdene. Hêriş de tewr kêmî 31 kesî ameyî kiştene ke înan ra 16 kesî zî polîs ê. Hêriş wextê nimajê îne de ameyo meydan. Wesayîtêko pirrî teqebar verê berê camî de ame teqnayene. Dima teqayîşî, kesê çekdarî cehd kerd ke bikewê zereyê merkezê polîsan û semedê na ye ra mabênê polîsan û hêrişkaran de şer vejîya. Rayedaran da zanayene ke tewr kêmî 50 birîndarî berdî nêweşxane. Labelê çimeyê ke Al Jazeerayî rê qisey kerd zî vat ke hûmara birîndaran tewr kêmî 75 kesî yê.
Teqayîşî ra zerarê girdî resayî camî û dêsê teberî yê merkezê polîsan zî rijîya. Vengê teqayîşî herêma dormeyî de zî ame eşnawitene.
Grûba girêdayê TTP’yî hêriş girewt xo ser
Grûba bi nameyê Îttîhadul Mucahîdîn a ke girêdayê TTP’yî (Têgêrê Talîbanê Pakistanî) ya, hêriş girewt xo ser. Ame dîyarkerdiş ke na grûbe fermandarê Talîbanî Hafiz Gul Behadir reyde têkiliye der a. Rayedaranê Pakîstanî hêriş tesdîq kerd û da zanayene ke pêkewtiş de tewr kêmî 6 hêrişkarî ameyî kiştene.
Herême de hêrişî zêde bîyî
Şaristanê Kohatî nizdê sînorê Efxanîstanî û Vezîrîstanê Zimeyî yo. Na herême de demê peyênan de hêrişê çekdarî zêde bîyê. Rojêk verê hêrişê Kohatî, herêma Hanguyî de zî vera yew karwanê leşkerî de hêrişêko bi bombeyan amebi kerdene û nê hêrişî de 6 leşkerî ameybî kiştene. Serekwezîrê Pakîstanî Şehbaz Şerîfî hêriş şermezar kerd û ferman da ke xebatê xelisnayîşî hîna bilez bikerê.
